شفتوا ازاي شويكار ظلمت فؤاد المهندس في الاغنية الرمضانية الشهيرة اللي بحبها جدا الراجل ده هيجنني ..وعلشان دايما وأبدا الرجال مظلومين والستات سو كيوت على الاخر ومش مفتريين خالص خالص .. حبيت اكتب حاجة ردا على افتراء شويكار على زوجها
المطيع الهادئ:p
............................
هل هلالك شهر مبارك
شهر كريم شهر فضيل
بس ازاى نصومه ياناس
بعد المدام ما طيرت العقل من الراس
بعد الظهر تنم مع جارتها
والعصر مقضياها تليفونات
رغي ولك مع اخواتها
تحكي على البرامج والمسلسلات
ده اتفرجت عليه 15 مرة
وده كمان غير الإعادة
انا قلت اللي عليا وهى حرة
رمضان ياخونا شهر عبادة
طاعة وصلاة وخير بزيادة
مش فرجة ابدا ع مسلسلات
ولا توك شو ولا فضائيات
ننسى شوية النم فى البلكونات
وده غير ليستة الطلبات
لوز وفسدق ومكسرات
ورز ومكرونة و10 فرخات
ايه ياست ده اسمه تبذير
بروج عقلي قربت تطير
اللي بيحصل ده كتير
تعيش وتجيب ياأبوالعيال
اياك تنسى اللحمة عشان الصواني
والزبادي كمان والراني
والفول والبيض والعيش
يووه هتنسيني وكمان الياميش
اصرخ ياناس واخلي شعري كنيش
اما انتِ بصحيح متختشيش
ولا الدم في عروقك خلاص مفيش
اجيب منين ياهو ممعيش
ده كمان لسه دخلة العيد
وعيالك عايزين لبس جديد
اتصرف ياأبو ابتسام
واسمع كلام الست المدام
أيوة ياراجل ده الدنيا صيام
صيام ايه ياشيخة بقى ده اسمه كلام
ايه بيحصل ده والله حرام
مراتي ياناس خلاص هتجنني
وبروج عقلي هتطيرها مني
اجيب منين لكل ده مصاريف
الطف بعبادك ياستار يالطيف
حد يفهما ان كلامها تخاريف
واللى بتقوله ولا ف الاحلام
اصحي ياهانم وفوقي من الأوهام
قولولها تفوق وتبطل جنان
عمر ما كان ابدا ده رمضان
رمضان نفكر فيه ازاي نرضي الرحمن