عسكر في المعسكر
العسكر الحلو الجميل ازاي نطالب بإسقاطه ياوحش انت
ازاي تنادي بعلو صوتك وتقول يسقط يسقط حكم العسكر
انت عارف معنى حكم العسكر ايه؟؟؟
العسكر المسؤلين عن البلد وكل مسئول يبقى قائد وكل قائد هو بمثابة حاكم (
(تحليل طفل في ابتدائي)
يع عليكي العسكر هم اللي حرورا سينا
ورجعت سينا كاملة لينا ومصر اليوم في عيد!!!
اولا احنا مش بنطالب بإسقاط الجيش .. الجيش هو اخويا وجاري وابن عمي وابويا
احنا بنطالب بتسليم السلطة .. فيها حاجة دي .. ليه بيماطلوا في كده؟؟
ليه رافضين يفتحوا مثلا باب الترشيح من الاسبوع الجاي ؟؟..ايه المانع ؟؟
ثانيا: يحضرني موقف زمان كده مش زمان اوي
لما الشباب نزلوا التحرير يوم 25
وطلع بابا مبارك في بيان وقال بيان يبكي له قلوب المصريين العطوفيين جدا
وشتموا في الشباب بتوع التحرير وطالبوهم يرجعوا بيوتهم
وانتوا هتخربوا البلد وكذا كذا والخ الخ الخ .. ده ريسنا حبيبنا ابو ضربة اولى اللي حاكمنا ومستتنا من 30 سنة وهو اللي محررنا هو والكلام الخايب ده
نفس السيناريو العبيط
بيتكرر تاني
ازاي تطالبوا باسقاط العسكر اللي هو المشير
مساند مبارك طوال سنين اكيد نابه من الظلم الشعب جانب
وزي المثل ما بيقول الطيور على اشكالها تقع
اذا كان بعد ما الثورة قامت ونجحنا في اسقاط مبارك اكتشفنا
ان كل الدولة كانت فاسدة , يبقى المشير هيطلع ولي من اولياء الله

انا شايفة ان نصر ربنا قريب وهيظهر الحق وهيرجع تاني هؤلاء ال ........... العطفيين هيقولوا احنا اسفين ياثوار التحرير
احنا اسفين ياللي ناديتوا بيسقط يسقط حكم العسكر
وبرده هيطلع منهم ناس هيقولوا احنا اسفين يامجلس متباطئ
احنا اسفين يامجلس العسكر
أحب اسأل شوية اسئلة بسيطة
ياترى ليه لحد دلوقتي مرجعش حق اللي استشهدوا من سنة؟؟
الرسول (صل الله عليه وسلم كان لا يغمض له جفن اذا سال دم مسلم كان عنده حرمة الدماء)
ياترى ليه بيتعامل سجان طرة ولا كإنهم في فندف 77 نجمة؟؟
ياترى ليه متحكمش عليهم لحد دلوقتي؟؟
مين هو الطرف التالت اللي السبب في كل الكوارث دي؟؟
وازاي قوة كبيرة ومسئولة عن وطن بأكمله مش عارفة تقبض على شوية بلطجية بيخربوا في البلد؟؟
ازاي مشير كبير ومتزن يقول بعد حادثة ومأساة كبيرة زي فاجعة بورسعيد الشعب عارف مين اللي عمل كده .. دول اطراف من الشعب .. انزلوا خدوا حقهم .. نعم .. عايزها حرب اهليه سيادته ولا ليها تفسيرات تانية؟؟
ياترى ياللي بتدافع عن العسكر لو ابنك او بنتك ماتوا ضمن اللي ماتوا في الاحداث المؤسفة اللي مرت على مصر وحقه مرجعش ودمه راح هدر كنت برده هتفضل على موقفك؟؟
بعض الاسئلة اللي بتدور في عقل مواطنين كتير ومن غير اجوبة !!!
أحب اقول في الاخر
اللهم أرنا الحق حقا وارزقنا اتباعه وارنا الباطل باطلا وارزقنا اجتنابه