هنا سيلتقي قلم مبدع لشاعر عظيم وهو مهندس نبيل محمدي
مع قلمي المتواضع لنقدم لكم مساجلة شعرية
أدعو من الله أن تنل إعجابكم
(غير مسموح بالردود إلا بعد الانتهاء من المساجلة)
دعواتكم بالتوفيق

سيبك بقى يابابا من الزمن الل فات
بجد مليت من التقاليد والأصول والعادات
والبنت تقعد في البيت خلاص العصر ده مات
دلوقتي مفيش فرق بين الأولاد والبنات
خليك أب فيري ده إحنا في زمن الاختراعات
وإيه يعني لما أرجع متأخرة ولا أعمل شات
بلاش تتدخل في حياتي الخاصة بالذات
أنا كبيرة كفاية وأقدر احكم على كل الحاجات
عديها وبلاش الخنقة دي في كل التصرفات

كده برضوا يابنتي دا أنا ربيتك على حب الدين و الإيمان

وجاهدت في تربيتك ، وسهرت كتير لحد مابقيت تعبان

أملي كان فيكي تكوني زي زينب أو عائشة صاحبات الإيمان

حتى سميتك سارًًة تيمناً بزوجة إبراهيم خليل الرحمن

علمتك الصلاة و الصوم و الصدق و علمتك حفظ القرآن

علمتك حب الخير و حب الناس و حب الرحيم الرحمن

بعد دا كله عايزة يكون ليك من الصبيان أحبة وخلان

تتشاتي معاهم و تسهري بدل ما تستجدي من ربك الغفران

و يخدعك واحد منهم و تندمي و تقولي ياريت أرجع زي زمان

مش ده اللي هيخليكي فري و تبقي مودرن و تخشي البرلمان

كُبرك نكسة عليا آه.. أه.. من الضغط و السكر و الجلطة كمان

و لتبدع إبنتي بمزيد من المخالفة و العصيان

ياباي على كلامك وعلى التحكمات

كل شوية ضغط وسكر وإفتكاسات

زهقت بقى من جو المستشفيات

فُكك بقى يابابا من التعقيـــدات

وكمان عايزني أتكلم عربي وأنا خريجة لغات

وبعدين ماله لبسي ما هو كده عادي

بلا حجــــــــــــــاب بلا كلام فاضي

عجبك كده أخرتني على ميـــعادي

على فكرة أنا رايحة أقابل أصحابي في النادي

وإحتمال كبير عندهم أبات

باي بقى وخلينا على رنات

(في انتظار رد الأب الحنون):)

مين قال يا بنتي أن الحضارة تتعارض مع الأديان

هى الحضارة نيولوك و مشي في الشارع من غير فستان

و لبس محزق و ملزق و يظهر كل إللي كان مستخبي زمان

و شعر منكوش... و جيب منفوش... و لا أم الغيـــــلان

يا بنتي اهدي شوية دا أنت حبة قلبي و نور عيني و كل الوجدان

دا أنا بحبك حب شديد و خايف عليك من وزة شيطان

و بلاش تصاحبي سوسا و توتا و لولا و ما عرفش مين كمان؟

وبلاش تنامي عندهم و تعصي أبوك و تغضبي الرحمن

مش هتلاقي غير حضن أبوكي تحسي فيه بالأمان

هيه الحضارة إنك تقابلي حب أبوكي بالعصيان

و التليفون و الرنات و الله دا كله شغل شيطان

خديلك قدوة من د.فكرة و ماما أماني و ماما جيهان

و الحقيقة لو دورتي على القدوة فالمنتدى مليان

وجعتي قلبي من شدة النفور و الشذوذ و العصيان

تعبت تعبت و لازم أسيبك و أروح أنام

و لتبدع إبنتي بعرض مزيد و ألاعيب الشيطان

من الاخر حياتي كده عجباني

يعني من امتى كنت عايش علشاني

كل ما أسأل عليك مشغول

وكل ما أجى أتكلم كلامي مش مقبول

كان نفسي تكون معايا علطول

على فكرة عن تصرفاتي أنت المسؤول

أسكت أحسن ولا عايزني أكمل وأقول

ده ياما كنت بتسيبنى في البيت وحيدة

وكل يوم كنت بتتحج بحجة جديدة

مرة علشان الشغل ومرة ومرة وهي حجج عديدة

شوفت أد إيه المسافة بيني وبينك بعيدة

ما هو كان لازم أدور على أصحاب

يعوضوني عن حب أعز الأحباب

الأب مش فلوس ونصيحة على الماشي كل شهر

الأب سند وعون وحد يفهمك طول الدهر

عرفت أد إيه أنا عايشة في قهر

(في انتظار رد الأب على الابنة):)

يــاه... بكلامك ده أحرجتيني

و بكل معانيه عذبتيني

و من نوم الليل حرمتيني

أنا كنت فاكر أن جمع المال ده شغلي

و زيادة دخلي دا كل أملي

و رصيدي في البنك أكبر همي

بس طلعت أنا غلطان

و زعلت أوي من نفسي كمان

أنا كنت من حبك في حرمان

سامحيني يا بنتي هغير من نفسي

و من بكرة هديلك أكبر جزء من وقتي

و مش هتنامي تاني أبداً بعيد عن حضني

بكرة هشتري لكي حمصية

و أخرج معاك في جولة بالعربية

نلف في القاهرة و الشرقية

و أسمع كل حكاياتك المستخبية

و نركب المراجيح و نروح الزقازيق

نلعب و نضحك و أكون لك أحلى رفيق

و نتكلم مع بعض كلام صديق لصديق

و أقول لك رأي في الدنيا ديه

و لك مني كل يوم هدية

نصيحة حلوة متنقية

من اللي حصل معايا في الدنيا ديه

و تحية كبيرة على صراحتك الإنسانية

و إن شاء الله نبدأمن الأول بداية هنية

خلاص من بكرة مفيش أي قهر

و لا تطنيش و لا مقابلة كل شهر

أنا أبوكي حبيبك طول الدهر

 

ننتظر المزيد من الإبنه الفنانةالمبدعة

اسفة يابابا على كلامي القاسي

ده أنت أغلى حد,ده أنت أعز ناسي

وأنت كنزي في الدنيا ديه,أنت ميراثي

أنت هديتي,أنت نور عيني وأنت نبراسي

كلامك من هنا ورايح على راسي

وشكرا ليك إنك أخيرا وصلك إحساسي

أنت أغلى عندي يابابا من العيون

ده حتي أنا نسخة منك بالكربون

اسفة لو جرحتك بكلمة في أي يوم

اسفة لو شيلتك بكلامي بحر من الهموم

اسفة على غلطاتي وعلى كلامي المسموم

اسفة لو طيرت من عينيك النوم

اسفة لو طولت بكلامي عليك الليل


اسفة لو زعلتك مني يابابا نبيل

ده أنت سندي في الحياة وأنت الدليل


_______________
(في انتظار رد بابا نبيل) :)

مين قال لك إني منك كنت في يوم زعلان

حد يزعل من نفسه دا ميكونش إنسان

أنا بس عليك من غدر الدنيا كنت قلقان

و أنا عارف أن بنتي ملاك مش إنسان

و مش ممكن تسيب نفسها للشيطان

أنا عارف إنك راجعه و لابسه فستان

و ساترة شعرك و جسمك كله كمان

أنا عارف إنك أصيلة و بتخافي من الديان

من يرضى لنفسه يمشي أمام الناس عريان

إلا إذا كانت نبتة خبيثة باعت نفسها للشيطان

دا أبوكي بيصلي بالناس إمام

و ميستحملش عليك نظرة طمع أو حتى إبتسام

تعالي يابنتي إرتاحي في حضني و سيبك من الكلام

دا أنت طاهرة و نقية و أنت حفيدة خير الأنام

دا رجوعك لحضني هو مسك الختام

دلوقت بس أأقدر أغلق المقلتان و أنام

أحبتي في الله :

كانت هذه المساجلة فكرة إبنتي صدفة سعيدة ، هى إقترحتها ، و هى
أدارتها ، و هى التي أبدعتها.
و أعتذر لكم عن أي غلطة في النحو أو الإملاء .
كما أعتذر عن أي عبارة صدرت منا و جرحت إنسان .

أحبتي :

ننتظر منكم الأن مشاركتكم ، و تعليقاتكم ، و توجيهاتكم .

فتفضلوا بأمان

الأستاذة / صدفة سعيدة

مهندس / نبيل محمدي