حكايتي مع تاميكوم

قبل كده من سنة تقريبا كتبت نادين موضوع اسمه"فات عليا سنة في تاميكوم" كانت منزلاه منذ بداية تسجيلي في المنتدى ولما قرأته قلت لنفسي (ممكن أقعد فعلا سنة كاملة في منتدى تاميكوم")بصراحة قلت أكيد لا,خصوصا إني شخصية ملولة جدا ومش بثبت على حاجة فترة طويلة لكن معرفش بصراحة استمريت الفترة دي كلها إزاي في تاميكوم بس كانت سنة من أحلى سنين عمري بالرغم إن اختلفت مع بعض الناس وأصحبت قريبة من ناس لكن فعلا كل الناس هنا أثروا في شخصيتي بالإيجاب طبعا,استفدت من كل فرد من أفراد العائلة التاميكومية,اتعلمت كتير من تاميكوم واتغيرت حياتي بسبب تاميكوم
بإختصار هكتب كل اللي استفدته من بداية تسجيلي في المنتدى
1-اتغيرت في طريقة كلامي,في أسلوبي في الحوار بقى عندي خلفية على اللي بيحصل حواليا
2-اتحسنت شويتين في اللغة العربية الفصحى لأ شوية بلاش أكذب
3-اكتشفت ان ممكن أكتب شعر ,تصدقوا أول مرة أكتب فيها شعر كانت هنا في تاميكوم لما كتبت غزل من نوع خاص هو أينعم مش شعر بالمعنى الصحيح لكن اكتشتفت إن ممكن أكتب كلام موزون ومقفي واشتركت في مسابقة ساقية الصاوي للشعر العامي وكان من سابع المستحيلات ان ممكن اشترك في مسابقة أدبية
4-الأهم من ده كله اتعرفت على ناس أصبحوا جزء أساسي من حياتي ,ناس بقوا أصدقاء مقربين من قلبي بيفهموني من قبل ما اتكلم
5-بقيت بفهم في السياسة من خلال متابعتي لمواضيع عقليات ما شاء الله عليها موجودة هنا معنا ,بتابع مواضيعهم دون رد لكن كنت بضيف لمعلوماتي معلومات جديدة من خلال مواضيعهم الرائعة
6-اتعلمت إزاي أسامح,وامتى أغضب ,وإزاي اتحكم في أعصابي "مش أوي يعني:p بس اتحسنت عن الأول بكتير"
7- بقى ليا "folder" ; كامل على الكمبيوتر اسمه منتدى تاميكوم فيه كل مواضيعي اللي كتبتها هنا ,لما بفتحه مش بصدق نفسي إن أنا كتبت كل المواضيع دي ,مكنتش مصدقة أصلا إن ممكن اكتب ولا موضوع في حياتي نظرا لكسلي الشديد لكن ردودكم على مواضيعي وتشجيعكم المستمر كان حافز ليا ودافع خلاني اكتب أكتر وأكتر
8-بقيت وزيرة "كان حلمي من زمان إن أكون شخصية مهمة":D وأهو اتحقق حتى لو افتراضيا أينعم مقدمتش أي جديد لمدينة الشعر وأينعم نويت إن مش هرشح نفسي تاني للوزارة لإن مضفتش جديد لكن أهو حققت حلمي
9-كانوا زمان بيقولوا معرفة الناس كنوز,لكن انا هغير المثل ده لو سمحتوا (معرفة الناس من خلال تاميكوم كنوز)
10 وأخيرا فرحتي الشديدة بصدور كتاب عصير العقول وخصوصا لما مسكته بإيدي وتنقلت بين صفحاته ,اكتشفت حاجة غريبة في كل الكتاب الأفاضل اللي موجودين فيه اكتشفت كإني بقرأ ليهم لأول مرة مع إن قرأت مواضيعهم من قبل لكن إحساس جميل وغريب انتابني حسيت إن بكتشفهم من أول وجديد وقلت لنفسي ايه الناس الرائعة دي
مش عارفة ليه حسيت بكده يمكن لإني بفضل الكتابة الأدبية الورقية الملموسة باليد أكثر من الكتابة الأدبية الإلكترونية, بس الكتاب فعلا رائع بمعنى الكلمة "وخصوصا المقدمة عجبتني" لدرجة ان تصفحت كل أجزاء الكتاب و نسيت صديقتي العزيزة هبة وهى قاعدة معايا ,وقالت لي هبة "اه أنا جاية لك مخصوص علشان حضرتك تقرأي الكتاب وتسبيني" سامحيني ياهبة فعلا الكتاب شدني. 
مش مصدقة فعلا إن مر سنة عليا وأنا في تاميكوم "كإنه حلم يمر في خواطر النائمين" بالرغم من حالات الإكتئاب المتتالية اللي بتصيبني لتأثري بكل حرف يخطه يد أديب من أدباءنا وبكل قصة منقولة أو عمل أدبي بتفاعل مع الأحداث لدرجة ان بوصل لحالة لا يرثي لها,
ما علينا رغيت كتير لكن حبيت أقول ,شكرا تاميكوم وشكرا رئيسنا وشكرا لوزراءنا ولكل عضو محترم سجل في المنتدى وما زال معنا وكل عضو محترم غاب عنا وبعتبر نفسي إن عمري سنة فقط هى السنة الأولى لي هنا معكم يعني انا عندي سنة يعني لسه بقول على السكر أوكر:D
ملحوظة :سامحوني على الأخطاء الإملائية إن وجدت وسامحوني لإن كتبت الموضوع باللغة العامية ,كان نفسي اكتبه بالفصحى لكن بحس ان باخد راحتي في العامية
وأرجو من الجميع ان يسامحني لو غلطت في حق أي حد قبل كده بقصد أو من غير قصد واعذروني لو كنت عضوة ثقيلة على أي حد منكم استحملوني أنا زي مامتكم الصغيرة:p
وهي دي كانت حكايتي مع تاميكوم!!!