اللحمة (قصيدة شعر)

هذه القصيدة من ديواني الخاسر في مسابقة الساقية
على الرغم من إن أصحابي وأخوتي وكل من يعرفني نصحني بعدم وضع تلك القصيدة في الديوان
لأنها لم تنل إعجاب أي أحد "لا أعلم لماذا حقيقة"
غير سيلنت هى الوحيدة اللي جاملتني أكيد ومدحتها 
ولكني اعتز بكل حرف كتبته حتى إذا كان لم ينل إعجاب الاخرين وإليكم القصيدة الخاسرة
______________

ياكيلو لحمة نفسي أطولك

واقع في عرضك واقع في طولك

نفسي فيكِ ياحتة لحمة

بطني بقت شبه الفحمة

ياناس ياهو فين الرحمة

فاكرة لما كنتِ ب40 قرش

ولا فاكرانا خرس وطرش

ده أنا هصرخ وهقول فيكِ

ولا يهمني غلوك ولا يهمني

اشتريكِ

ياكيلو لحمة

**********
كفاية عليا حبيبي الفول

ده إن خلص الفول مين المسؤول

ده حتى الفول كله فيتامينات

وبياكلوا الفقير والبيه

وكيس منه بربع جنيه

هيقضينا أنا وزينات

وخديجة والواد بركات

وجارنا محسن والست عنايات

ياكيلو لحمة
*********
ومش هسأل يالحمة فيكِ

ومش عايز أشوفك بالله عليكِ

خليكِ عايشة كده دور البرنسيسة

ده مفيش أحسن من الطعمية ببريزة

ومعاها شوية مخلل والعيشة تبقى لذيذة

مهما إن كان ده أنا نفسي عزيزة

وبردوا مهما حصل مش هسأل فيكِ

ياكيلو لحمة
***********
اسف ياستي معلش هرجع في كلامي

والله ده كله ما يغني عنك يامعجباني

اه ياسيدي في فتة ولحمة ضاني

وطبق شوربة ياغلبي ياني

ياحلو ياأحمر يامدوخاني

وللويل والذل مورياني

ومن كتر شوقي مسهراني

اه قربت أشد وداني

ياكيلو لحمة

*************
طيب ليه ياستي سايقة دلالك

ومخبية حسنك ومخبية جمالك

وأوعي تردي وتقولي أنت مالك

ياكيلو لحمة امتى الوفا

تعبت خلاص من كتر الجفا

ولا بقيتي خلاص من نصيب الغلا

ومعدتش ينفع خلاص البكا

ياكيلو لحمة

_____________

إلى لقاء في قصيدة ياكيلو طماطم قريبا في الأسواق