اعلانات اعلانات
في كل مكان اعلانات
فوق بناية أو سطح عمارات
وفي الشوارع والحارات
وفي الجرايد والمجلات
وفي المترو والمحطات
وعلى النت وكل القنوات
لو فتحت دولابك ممكن تلاقي اعلانات
ما هو في كل مكان اعلانات
***********
ده اعلان مكتوب فيه مطلوب انسة
تشتغل بياعة في محل هدوم
تبيع أي حاجة وف الاخر تقبض المعلوم
ومواعيد الشغل من الصبح للمسا
والشروط أنها تكون كويسة
ومش مهم المؤهلات التعليمية
المهم المؤهلات الجمالية
وياسلام لو عينيها عسلية
والشعر طويل والبشرة خمرية
ويستحسن القوام يكون قوام حورية
يلا يابنت أنتِ وهي
قدموا دي وظيفة خيالية
ياعيني عليكِ ياصبية
ما هي الدنيا كده
بتبعنا لده وده
وكله في الاخر اعلانات
************
وده اعلان لمركز تجميل المحروسة
لو بوصة هنخليكِ عروسة
هنخليكِ زي صينية البسبوسة
مش هنخلي جوزك يبُص لواحدة تانية
ولا يقدر يبربش عينه عنك ولو ثانية
لو عايزة شفايف نانسى وجسم هيفا كله موجود
من شد ونفخ وشفط وتكبير من غير حدود
عندنا هنا كل الحاجات
أهم حاجى تحضري الكاشات
لازم تكون باليورو والدولارات
وهو كله فى الاخر اعلانات
*************
وده اعلان مكتوب فيه شقق للإيجار
طول ما انت معانا عمرك ما هتحتار
ولا يلعب بيك ولا يضحك عليك أي سمسار
والمفاجأة مفيش مقدم والقسط اخر انبهار
ده القسط خيالي كل شهر 20 ألف دولار
معانا هتتحطم كل الأسعار
كل ده في عمارات عبدالجبار
ما هو عبدالجبار كان أصله بياع خضار
وفجأة بقى من أصحاب الدولار
يلا ما هي الدنيا مبتدومش
ومين فيها مبيتغيرش
وكله في الاخر اعلانات
**********
ده اعلان لجهاز جديد
لو حزين يخليك سعيد
لو هزيل يخليك شديد
بس خلوا بالكوا من التقليد
وممكن تستفيد منه في التخسيس
ده كلام بجد مش تهييس
ما هو من اختراع الصيني يونغ فرنسيس
واهو كله في الاخر اعلانات
*********
وده اعلان لألبوم جديد
للمطرب مدحت العنيد
ومطلعه بيقول
البطالة العنوسة الادمان
كله بيجيب جنان
أحمر أسود أخضر
والكل بقى عنده عمى ألوان
وال ايه الألبوم حقق مبيعات هايلة
اه يادنيا امتى هتتعدل فيكِ المايلة
وكله في الاخر اعلانات
**********
وده اعلان لمسحوق غسيل
مسحوق سحري وملوش مثيل
عمرك ما هتلاقي ليه بديل
ده حتى ممكن للهم يشيل
وكمان لمرارة الأيام يزيل
صدقتني إنه مسحوق خارق
ولو قارنته بغيره هتلاقي فوارق
وممكن كمان نوصله لحد دارك
ما هو كله في الاخر اعلانات
***********
اه خلاص تعبت
ومن العيشة دي زهقت
نفسي في فاصل مش اعلاني
ولو ارتاح حتى لثواني
مليت خلاص اه ياني
وجالي خورم في وداني
دماغي من الصداع وجعاني
من كترهم نسيت مين الاخير
ومين الأولاني
دول نسوني حتى عنواني
وأهو كله في الآخر اعلانــــــــــــات