الاختلاف في الرأي يفسد في الود قضية ؟؟؟

_ازاي يامغفل انت وهو
تؤيد المجلس
_شوفتوا الشباب التافه بيعمل ايه نازل التحرير
ما هو فاضي ومش وراه حاجة
_بيقولك اساسا دول شباب مأجورة وشوية بلطجية
_بيقولك بقى الا ايه عاوزين الجيش يسيب البلد اومال مين اللي هيحمينا من بعده
_ انتوا بتشتموا في الثوار الشرفاء يابن كذا وكذا وكذا
وكرسي في الكلوب
تشيت طاخ طوخ اااه
وضاع النيل ياولدي
أكيد الحوار ده سمعناه وطرشأنا منه الايام اللي فاتت
ولسه بعد المليونات اللي هتحصل بكرة
وهنشوفي اجدع مااتش فيكي يامصر
هتتفرجي على ولادك اللي شربوا من نيلك
وشربوا من المر لحد ما بقى ياكلوا وينهشوا في لحم بعض
ده حتى احنا مش مديين فرصة لغيرنا يهنش في لحمنا ماشيين بمبدأ
أنا اولى بلحم اخويا من الغريب.
ليه , ليه بجد معندناش احترام للرأي الاخر
ليه معندناش احتمال ان رأيي خطأ يحتمل الصواب
ورأي غيرى صواب يحتمل الخطأ
ولا هو رأيي صواب وان كان عاجبك يابن (محذوف من الرقابة ) (((
انت مع المجلس ياسيدي مااشي انت حر بس متشتمش في الثوار
ومتلعنش
انت مع الثوار وضد المجلس , ماشي رأيك وانت حر عبر عنه
بس مش كل لما تلاقي واحد بيقول
ياجماعة انا مع المجلس والناس اللي نزلوا التحرير غلط
تقوم سيادتك تاخدك الكرامة وتبدأ الهجوم
بلاش نشتم ,بلاش ناكل في بعض زي الديابة
وفي الاخر هنخلص على بعض وهم اللي هيرتاحوا مننا
بلاش نرد الاساءة بالاساءة
الاديان السماوية ملقتش كده .
الشهيد عند ربنا في مكانة احسن من اللي كان فيها
عاوزين تاخدوا حقه يبقى بالعقل وبالاخلاق
وبالتصرف الصح وبشعار الثورة من اول ما بدأت سليمة سليمة
في ناس بتحب الكوسة وناس بتحب الخيار
عادي جدا وده طارئ ولولا الاختلاف لبارت السلع
مع ان الاختلاف دايما موجود والسلع برده دايما بتبور
مش عاوزين نمسك في بعض ونتصدر في الهيفا ونسيب المشكلة
الاساسية .. ربنا ميزنا بالعقول بلاش نلغي عقولنا ونبقى شبه الجماد
ولا هو فعلا ربنا وزع الارزاق ومحدش رضي برزقه
لكن لما وزع العقول كل واحد عجبه عقله
وشايف الباقيين أغبياء مبيفهوش وهو عبقري زمانه
فكروا يااناس شوية وأكبروا وأعقلوا
وياريت يكون عندنا احترام للرأي الاخر ..
ان فيه ناس هتعترض مع كلامي .. اعترض ياسيدي بس بأدب.. ممكن ؟؟
انا والله بحب اللي يعترض معايا ونتناقش ونتشاور !!!!
ولا هو بقى الاختلاف في الرأي يفسد في الود قضية ؟؟؟؟