مها:كل سنة وانت طيب ياحبيبي..النهاردة أول يوم رمضان

عماد-وانتى طيبة ..يعنى عاوزة ايه؟ إنجزى يامها وقولى عاوزة تفطرى عند حد وللا عاوزة تشترى حاجة وللا داهية تكونى عاوزة فانوس..ماانتى كل سنة تطلعيلى فى حاجه

-بس بس كل ده عشان بقولك كل سنة وانت طيب..ليه الظن ده..هو انا عملت إيه يعنى؟

-خلاص..خلاص ماتزعليش وانتى طيبة ياحبيبتى

-هو بس طلب صغنون أد كده

-مش قلتلك ..بلاش بقي تعيشي دور البريئة..هاه إخلصى عشان إتأخرت ع الشغل

-ماهو انت مش هتروح الشغل النهاردة

-ليه خير إن شاء الله

-النهاردة أول يوم رمضان

-عرفنا ماله يعنى أول يوم؟؟

-حبيبي إنت عارف إنى تعبانه وحامل وكمان طلبات عمر إبنك مابتخلصش وأنا صايمه وكمان إنت ناسي إننا عازمين مامتك على الفطار النهاردة ..يعنى ينفع نعزمها ومانعملش أكل

-ياااه دا انا كنت ناسي خالص..طاب نشترى أكل جاهز

- انت عارف ان أمك مابتحبش أكل برة

-خلاص إفطرى النهاردة أو ابعتى لواحدة من اخواتك تساعدك النهاردة..أنا عندى شغل مهم

-ياابنى أنا لسه فى أول الحمل يعنى الضرر مش كبير ،وكمان محدش فاضى النهاردة..أنا بس مش طالبه غير مساعدة بسيطة..بلاش شغل النهاردة عشان خاطرى

-وناكل منين ياهانم؟

-وطى صوتك هتصحى الولد ..دا أنا ماصدقت إنه نام..آه حاسه انى تعبانه..آااااه يانى

-مالك..أنا عارف إنه يوم مش فايت النهاردة والمدير كمان عمال يتصل من الصبح

-قوله إنك تعبان

-حرام عليكي ياشيخه..دا احنا فى أول يوم رمضان..عاوزانى أكدب..أنا هقوله إنك تعبانه

-إيه؟؟ إنت بتفول عليا

-إنتى مش لسه بتقولى إنك تعبانه

-أنا..آااآ..تعبانه طبعاً خلاص إعتذرله بقي وخلاص

وبعد قليل

-خلاص ياستى أنا كلمت المدير وقدر الظروف..هاه عاوزة إيه بقي؟

-بص بقي ياحبيبي أولاً تقلع هدومك دى وتلبس الترنج وعليه مريلة المطبخ

-مريلة ..إنتى جرى فى مخك حاجة.أنا ألبس مريلة

-بس خلاص ولاتزعل نفسك الحق عليا إنى خايفه على هدومك لاتتوسخ من التراب

-تراب ..هو احنا هنطبخ وللا ننضف

-الأربعة

-قصدك الاتنين

-لا الأربعة ياقلبي..هنروق الشقة ونمسحها ونطبخ ونشيل الشتوى عشان نسيت أشيله ،وبعد مانخلص ترمى كل الزبالة

-دول خمسة مش أربعة ،وبعدين رمى الزبالة دا متعود عليه

-ماهو عشان كده بقولك أربعة

-بس برضه مش هلبس مريلة

وبعد ساعة

-ههههههه..المريلة هتاكل منك حته

-إنتى بتهزرى..ما انا إتمليت تراب..انتى بقالك كام سنة مانفضتيش الشقة دى؟

-يومين بس

-دول سنتين يا ماما..هاه خلصنا نضافه

-خلصنا دا إيه.. لسه أوضه عمر وأوضتنا والمطبخ والحمام ..انت عملت حاجة غير الريسيبشن والبلكونات،وبعدين هتمسح الشقة كلها

-نعم ياختى..أومال إنتى هتعملى إيه؟

-إنت مش شايف بأكل الولد اللى صحيته بالخبط والرزع بتاعك

-سيبيه..دا عنده أربع سنين يعنى يأكل نفسه،وتعالى خلينا نخلص

-حاضر...يووووة شايف بيصرخ ازاى..بس ياحبيب قلب ماما تعالى يابيبي أنا مش هسيبك ..روح بقي ياعماد خلينا نلحق نطبخ قبل الفطار

-آه يابن ال...... إنتوا شكلكوا متفقين عليا

وبعد ساعة أخرى

-يامها ..مها..فين الملح والفلفل البصلة هتتحرق

-عندك يا أخى ووطى النار شوية

،وخد الطماطم إضربها فى الخلاط واسلق الفاصوليا وشوف الفرخة إستوت وللا لأ

-ماتيجى تساعدينى شوية

-الله مش بنيم الواد..هو أنا بلعب

وقبل الفطار بشوية

-يامها التوم فين عاوز أعمل الملوخية..مها..يا نهارك إسود..إنتى نايمه

-إيه فيه إيه ياعماد..إنت عامل دوشة ليه؟

-فيه إيه؟؟ أنا نفضت وكنست ومسحت وطبخت وسيادتك كل شوية تزوغى..الله. الله..مش دا الغسيل اللى من ٣ساعات كنتى بتحطيه فى الغسالة وبعدها نشرتيه وطبقتيه ..يعنى زى ماهو معفن أهه

-يوووة لقيت نفسي تعبانه..قلت أرتاح شويه. ما ارتحش يعنى

-لأ إرتاحى ياهانم إرتاحى خالص وآدى الزفته المريلة أهى،والله لأمشي من البيت خالص

-عماد ياعماد...أومال مين اللى هيعمل العصير؟