-مها يامها ..انتى فين؟
-انا هنا ياعماد فى أوضه النوم
-بسم الله الرحمن الرحيم إيه الهباب اللى فى وشك ده؟
-دا ماسك الفحم
-ماسك فى رمضان
-متخافش انا سألت وعرفت إنه مش بيفطر
-شيلى الزفت ده..الواد اتسرع..بس ياحبيبي متخافش..بقولك ايه بعد ماتشيلى البتاع ده اعملى حسابك إحنا معزومين ع الفطار النهاردة عند أختى سعاد
-مين؟؟لا ياحبيبي انا مش رايحه
-يعنى إيه؟
-أختك مابتحبنيش وكل ماتشوفنى تقولى إنتى تخنتى اوى يامها سايبه نفسك كده ليه.انتى مال بشرتك إسمرت كده ليه مع انى بستعمل أحدث الماسكات..تبقى تبص فى وشها الأول
-اللهم انى صايم..طاب عشان خاطرى..اخواتى كلهم متجمعين هناك
-ليه خير؟؟هيتفقوا على مين؟
-عيب يامها دى مجمعانا كلنا عشان الأيام المفترجة و ماما كمان هتكون هناك
-ماجمع إلا أما وفق ياخويا وأمك دى كل يوم معزومه فى حته هى فاضية وللا إيه؟
-مها..إلزمى حدودك أحسنلك
-ياخويا بلا حدودى بلا بتاع..م الآخر انا مش فاضيه النهاردة
-ليه بقي؟
-رايحه الچيم بتاع أم بطه أنا واصحابى عشان حاسه انى زدت شوية
-الله لاعنك تيجى ..خلى أم بطه تنفعك
-آه هتنفعنى طبعاً ..بقولك إيه خد الواد معاك..يا عماد عماد طاب رد عليا رايح فين؟
وفى اليوم التالى
-الله الأكل شكله يفتح النفس
-بالهنا والشفا ياحبيبي
-إيه ده..؟؟
-إيه فيه ايه؟
-هى الشوربه دى طعمها غريب كده ليه؟
-مالها ..ورينى كده..تصدق غريبة فعلاً
-هو انتى حطيتى إيه فى الأكل؟
-ولا حاجه
-راجعى نفسك كده
-آااااه. تصدق بدل ما أحط كركم الطبخ حطيت كركم التجميل..أما موقف هههههه
-بتضحكى ...والشوربه أصلاً مش بيتحطلها كركم
-دى وصفه الشيف مروان
-بلا مروان بلا شعبان..ياريت ماتخترعيش تانى
-حاضر..كٌل بقي
-ياساتر يارب هى السلطة فيها إيه؟
-إيه تانى؟
-دوقى كده
-يانهاااار دى خلطة التخسيس إيه اللى جابها هنا
-جابها عملك الاسود
-إنت اتجننت ياعماد
-آه اتجننت ..انتى المكياچ والتخسيس والكلام الفاضى لحس دماغك..هتعقلى إمتى بقي؟
-إنت بتقولى أنا الكلام ده؟!
-أنا زهقت خلاص ومش لاقى فيكى حل
-كده ياعماد والله ما آكل معاك
وقبل السحور
-مها يامها إنتى لسه زعلانه..خلاص بقي حقك عليا ..طاب كفايه بحلقه فى المراية ،وتعالى اقعدى جنبى ..على فكرة أنا بكلمك
-عاوز إيه ياعماد؟
- طاب إهدى شويه..بقولك خلاص ماتزعليش وآدى راسك أهه ياستى
-يانهار اسود ..يادى المصيبة
-ياساتر يارب..انتى اتنفضتى كده ليه..مصيبه إيه كفاالله الشر؟؟
-شايف اللى فى راسي
-ايه فيه ايه؟
-بص كويس يا أخى
-مفيش حاجه..شعرك حلو ومتسرح وريحته حلوة كمان
-ريحته إيه وزفت ايه..شايف الشعراية البيضه دى
-فين دى أنا مش شايف حاجه
-إلبس نضارتك ياعماد أهى تحت إيدى أهى
-ياحبيبتى وافرض دى شعرايه واحدة ..اومال انا اعمل ايه بقي اللى شعرى نصه شاب ههههه
-ماتشيب وللا تغور فى .....
-إنتى اتجننتى؟!
-مقصدش ياعماد ..بس المفاجأة خلتنى مش فى وعيي
-ليه كنت فاكرة نفسك مش هتكبرى وللا ايه؟.. أجيبلك شهادة ميلادك
-إيه الكلام ده؟
-إنتى لسه سمعتى كلام..يابنتى الإفراط فى كل شئ غلط..تلبسي آه..تحطى ميك أب لجوزك آه..تهتمى بنفسك وبمظهرك آه..بس بالمعقول متأڤوريش يامها..خير الأمور الوسط
-الحق عليا إنى عاوزة أبقي حلوة فى نظرك على طول
-ياحبيبتى انتى حلوة من غير حاجة ،والله الحاجات دى بتبوظ وشك،وانتى عندى أجمل من أى واحدة فى الدنيا
-بجد ياعماد
-طبعاً ياروح عماد..هتيجى تقعدى جنبي بقي
-طبعاً.........إيه ده؟؟ يالهوووى
-مالك..فيه إيه؟ خدى بتجرى كده ليه؟
-نسيت كورس الرشاقة وكمان خلطة التفتيح بتاعت كل ليلة.. مش هخلص قبل تسع ساعات لازم أبات بالخلطة..نام إنت بقي
-طيب..إبقي صحينى بعد ١٥ساعة أكون خلصت كورس الشلل بتاعى..ربنا كبير
****يتبع***
2
-2
