وبعد اسبوع

- ماشاء الله يامها شكلك مبسوطة اليومين دول إيه اخبار كتاكيتك؟

- الحمد لله ..بعد الدفايات واللمبات الكبيرة اللى باقيين احسن بكتير 

- اللى باقيين! ليه هو فاضل كام منهم؟

- لا دا مات٢٠٠ كتكوت بس

- آه...بس ..لا دا تمام خالص..ربنا يباركلك فى الباقي

- أنا بفكر أغيرلهم ديكورات المزرعة أخلى ألوانها مبهجه كده عشان أحسن من حالتهم النفسية ..ايه رأيك ياعماد؟ 

- طاب وبالنسبة لنفسيتى انا مفيش أى تغيير؟!

- ليه وانت ناقصك إيه؟

- انتى مش ملاحظة إنك بتقضى أغلب وقتك مع الكتاكيت،وكمان بقالك يومين بتأكلينا نفس الفطار..على فكرة أنا صايم

- على فكرة انا بعمل دا كله عشان الكتاكيت تكبر وتبيض 

- دا انا اللى هبيض من عمايلك...تصبحى على خير

- برضه مقلتليش اغير الديكور وللا لأ؟

وفى اليوم التالى

- الحقنى ياعماد

- مالك بتعيطى ليه؟

- إحنا اتحسدنا ياعماد..أنا كنت عارفه ان الناس مش هتسيبنا فى حالنا

- إيه "عمر" حصله حاجة؟

- لأ "عمر" بخير ...دا الكتاكيت

- مالهم؟

- ماتوا كلهم ياعماد ..جالهم إمساك وكرشه نفس بسبب كُتر الإضاءة والدفايات وجيبت الدكتور البيطرى قالى جالهم حساسية على صدرهم وإداهم حقن وعلاج ب٢٠٠٠ جنية،وبعدها بنص ساعة ماتوا ...يعنى موت وخراب دياااار

- بس بس..قدر الله وماشاء فعل إدعيلهم بالرحمه ولمى بقي دفاياتك ولمباتك والكهارب بتاعتك ونشوف بقي حالنا وبيتنا والواد الغلبان اللى حيلتنا ونمسكلنا مصحف ..نفرد سجادة ونصلى لله كده ..احنا فى شهر مفترج 

- لا ..أنا مش هيأس أنا فى بالى مشروع مكسبه مليون فى الميه،ومحتاجه ١٥٠٠٠ جنية بس بعد ما أسدد الفلوس اللى عليا الأول

- فلوس إيه دى؟ 

- ٥٠٠٠ جنية تمن الدفايات واللمبات اللى كنت مشغلاها ..أنا ماضيه على إيصالات أمانة بتمنهم ..هات الخمس تلاف وانا اديهملك من ارباح المشروع الجديد..هاه إيه رأيك؟ عماد ياعماد إيه ده؟ دا وقته يغمى عليك ..أنا مش فاضية للمستشفيات انا ورايا مشاريع 

**تمت هذه الحلقة**