مها: عماد ..اصحى ياعماد

عماد: أيوة يابنتى فيه ايه ؟..انتى بتصحينى ليه دلوقت..انا نايم بعد الفجر 

-هو يعنى انا اللى نايمة من المغرب ما انا نايمة معاك..اسمع أنا رايحة اعزى ..بنت عمتى ماتت من يومين ولغاية دلوقت مروحتش لعمتى أسأل عليها

- طيب ..روحى

- وهعدى على ماما ونهى أختى هيروحوا معايا

- طيب

- هو ايه اللى طيب..انت هتنام

- اومال عايزانى اعمل ايه بس؟!

- تيجى توصلنا..عوزنا نتشعبط فى المواصلات يعنى وفى الظروف دى..عوزنا نتصاب بالمرض 

- لا ياحبيبتى بعد الشر عنكم كلكم..بس انا هروح وسط الستات اعمل ايه؟!

- هما فين الستات دول..ياابنى مفيش عزا أصلاً ..التجمعات ممنوعة ماانت عارف

- ولما هو مفيش عزا اصلاً مصحيانى وأرفانى معاكى ليه؟

- ياحبيبي دى بنت عمتى ..يعنى لازم نروح..عماد..انت نمت تانى

- يييه هو أنا بعرف أنام ولا أتنيل فى البيت ده

- معلش ياحبيبي..كلها عشر دقايق بس..نسلم على عمتى ونقولها شدي حيلك

- من غير سلامات ..عشان الامراض

- طيب ماشي من غير سلامات ..بس هسيب الولاد فين..اقولك ماتتصل بمامتك تيجى تقعد بيهم

- أمى تانى..مش كفاية اللى عملتيه فيها

- أنا..هو أنا عملت حاجة ..دا قضاء وقدر 

- ايوة ياختى اتمسكنى..دا انتى بوظتى عينيها وطلعتينى اى كلام قدامها وقعدت عندها يومين كاملين أحايل فيها وأصالحها و.....

- طاب بس بس..هو ايه يعنى اللى حصل عشان دا كله،وبعدين الكلام ده من اربع أيام..شوف عدى عليه أد ايه؟

- ياسلااام..الاربع أيام بقوا زمن عندك؟

- ميبقاش قلبك اسود ياعمدة..وقوم اخلص بقى وإلبس عشان نلحق نروح،والولاد نبعتهم ل سعاد أختك وللا آمال

- بقولك ايه ..محدش من أهلى طايق يشوف وشك..ابعدى عن اخواتى خالص..انتى فاكرة انهم هيتلموا عليكى بعد اللى عملتيه فى أمهم

- اللى عملتيه..اللى عملتيه..ايه إرتكبت جناية يعنى؟

- ماتبعتيهم عند واحدة من اخواتك..وللا اخواتى انا بس اللى فى الهم مدعيه وفى الفرح منسية

- إيه كلامك البيئة ده..إنت بتلت وتعجن فى ايه؟ خلاص أنا هبعتهم لاختى مروة عشان تعرف بس انى من عيلة وعندنا أصل

- انتى قلتى ايه دلوقت؟

- قلت أنا من عيلة و....

- لا ..اللى قبلها

- هبعتهم لأختى

- اللى قبلها

- ايه قلت ان كلامك بيئة

- وبتلت وتعجن ...وطالما بقى بتقلى أدبك ..انا مش رايح ،ومش هرجع فى كلامى يامها

وبعد قليل:

عماد(يهمس): ماتخلصوا بقي انا زهقت..دا مش عزا ده، بقالنا ٣ ساعات قاعدين وأمك مش بتبطل كلام

مها( تهمس): وطى صوتك هتفضحنا..احنا مستنيين بنت عمتى تيجى من بيتها عشان نعزيها فى أختها بدل مانضرب مشوار تانى لحد بيتها

- طيب يا مها حاضر ،ودى هتوصل إمتى ان شاء الله

- ساعة زمن وتيجى بتجهز الفطار لجوزها وحماتها قبل ماتيجى أصلها ساكنة فى بيت عيلة

- شايفه الستات ..آهى دى لها جوز عاملاله حساب بتجهز الأكل لحماتها مش بتفقع عين حماتها

- وطى صوتك ياعماد..انت عاوز تفضحنى

- خايفه من الفضيحة اوى..مخوفتيش ليه لما العمارة كلها اتفرجت عليَّ وانا بتحايل على كل واحدة فيكوا شوية

- الله انت هتقرفنى معاك ليه ماقلتلك خلاص ..هبقي أروح أعتذرلها لما أعصابى تهدى

- وطى صوتِك..ولاد عمتك خدوا بالهم

- ماهو انت اللى بتستفزنى

- صوتك ياحماره

- بقولك انت اللى بتستفزنى..لما انسي اللى حصل ابقي اروحلها

- مين اللى ينسي؟..ومين اللى أعصابه تهدى؟ يعملوها ويخيلوا

- صوتك يا أخى هتفضحنى ..وبعدين إيه الأمثلة والألفاظ البيئة دى ؟! انت مالك بقيت بتلت وتعجن كتير كده ليه بعد الحظر

- انتى قليلة الأدب على فكرة ،وأنا غلطان انى جيت معاكى

- أقعد مكانك واهدى ..ماما جاية علينا

نوال( مامت مها )تهمس: لما انتوا جايين تتخانقوا ما تروحوا وتتخانقوا فى بيتكم أحسن

مها تهمس: يا ماما عماد بقى عصبى اوى اليومين دول

نوال: ياختى اتنيلى ..إحمدى ربنا ان مجتلوش ذبحة من عمايلك

عماد: هههههه آهى حماتى قالت كلمة الحق

نوال: جاك كسر حُقك ،وإيه حماتى دى ..مفيش ماما ..طنط..عمتى..انت بقيت بيئة

عماد: الله..ايه بيئة بيئة دى اللى ماسكينلى فيها

نوال: وطى صوتك هتفضحنا..انا همشي لحسن هتنقط من عمايلكوا

عماد: يووووه..مها...يا مها

مها: عايز ايه من زفته

عماد: هنتنيل نمشي امتى؟مابنت عمتك جت .. انا عايز ادخل الحمام من بدرى

مها: احنا مستنيين مرات أخويا عصام اتصلت وقالت جاية هى كمان هناخدها معانا واحنا مروحين وبعدين ماتدخل الحمام هو حد حاشك يعنى

عماد : مبحبش ادخل حمامات حد أنا حر مش برتاح غير فى بيتى

نوال: هششششش

مها: وطى صوتك بقى..كلهم خدوا بالهم ياساتر عليك

وبعد قليل

مها: شدي حيلك ياعمتى ..هى ناهد مرات ابنك فين؟

عنايات(العمه): بس متفكرنيش..دى بت قليلة الأصل من يوم ما ماتت بنتى مشفتهاش غير مرة واحدة

نوال: اخص عليها وعلى أصلها..دى واطية

عنايات: لأ وايه بتعاملنى معاملة زى الزفت..تخيلى يامها يابنتى اقولها اعملى الفطار تقولى فطرى نفسك عصبتنى وابنى زعل منها اوى وطردها على بيت ابوها وجت اعتذرت تانى يوم وباست على ايدى 

نهى( اخت مها): والله انا مابطيقها خالص

مها: ايه ده؟ ايه الأخلاق دى..دى قليلة الذوء خااالص..فيه واحدة متربية ترد على حماتها..انا مش بطيقها خالص ياعمتو أصلى مبحبش قلة الأدب

عماد : هههههه انا أعرف واحدة كانت هتقلع عين حماتها ههههه

مها: اسكت انت خالص

عنايات: بس لحسن آهى جت أهي ...حبيبتى يا مرات ابنى تعالى ياغالية اقعدى جنبى..تعالى يا ناهد يابنتى

مها: حبيبه قلبى وحشانى يانودى وحشانى موت

سلمى على ماما..احنا بنسأل عليكى من الصبح

نوال: ياروحى كنت هزعل اوى لو مشفتكيش النهاردة عاملة ايه يا نونه

عماد : ايه ده؟.. مش دى...دى....اللى لسه كنتوا بتقولوا

مها : اخرس انت مالكش دعوة

عماد( يهمس): ياولاد الجزمة

ناهد: وانتوا كمان ياجماعة كنتوا واحشينى اوى اوى .انا لسه جاية من عند رباب

نوال: مش دى بنت وفاءاللى كانت ساكنة جنب علا بنت اختك

ناهد: هى بعينها..اسكتى ياطنط..جوزها اتجوز عليها

نهى : اخص عليه قليل الأصل

ناهد : ايه ده هو انتى هنا يا نهى وحشانى يا عمرى

نهى : وانتى اكتر ياروحى.اه وبعدين كملى

ناهد : رحتلها اتطقس واشوف ايه الأخبار لاقيتها ياحبه عينى مموته نفسها من العياط

نوال : على ايه؟ دا حتى كان تاعبها وبتشتكى منه..ولما اتجوزته كانت ايه زى فلقه القمر ..تعالى شوفيها دلوقت اتبدلت وبقت واحدة تانية بقى شكلها وحش اوى 

مها: ايوة يا ماما عندك حق ..دى كانت قمر منور..بس منه لله

عماد : يعنى هو اللى طفاها؟

مها: اسكت انت مالكش دعوة

عماد : طاب هنتنيل نروح امتى؟

مها: استنى لما ييجى ابن عمتى نسلم عليه ونمشي على طول

عنايات: وطول عمرها هادية وغلبانه 

نوال: ومؤدبة..بس هو باين عليه عينه زايغة

ناهد: لأ يا طنط مش دا السبب ..أصلها مبتخلفش

مها : ياخبر...هى مش قالت قبل كده انها كشفت وطلع مفيهاش حاجة

ناهد: كدابة...ومدارية كانت خايفة يتجوز عليها

نهى: اخص عليها وعلى أصلها..البت دى طول عمرها مش سهلة 

عنايات: دى طول عمرها سماوية وكيادة مبتحبش حد 

مها: ولسانها طويل يا ماما..انا عرفاها دى عاملة زى هناء بنت خالت فوزية ..فوزية عبد الباقى ماانتى عرفاها

ناهد: ماهى حكاية فوزية زى حكاية رباب

عماد : ثوانى بس ..هى رباب غلبانه وللا وحشه..لسانها طويل وللا مؤدبة ،وجوزها بقي..اتجوز عليها عشان مبتخلفش وللا عينه زايغة..نحدد كلامنا ياجماعة مش كده

مها: استنى ياعماد نشوف موضوع فوزية

عماد: اوك نركز على فوزية .مالها بقي؟

ناهد: فوزية بقي دى يا أستاذ عماد كانت متجوزة واحد جارها بس ايه واد امور وحلو اوى..مز يعنى وغنى غنى جداً

نهى: هاه..وبعدين

ناهد: وكانت بتحب ابن خالتها ومش قادرة تنساه وفضلت تحبه حتى بعد ما اتجوزت

نوال: ياساتر يارب بس ياختى اسكتى احنا ف رمضان ..استغفر الله العظيم..ربنا يستر على ولايانا

عماد: لأ هى كده غلطانه بصراحة..يعنى بتقولك واد مز وفلوس تحب غيره ليه..أكيد الموضوع فيه إن

عنايات: بالظبط يا أستاذ عماد ..الموضوع مش كده خالص..هى كانت طالبة الطلاق عشان جوزها كان عاوز يرجع لمراته الأولانية ويكتبلها كل حاجة

عماد : لأ فى دى هو غلطان ..حرام يكتب لواحدة كل حاجة والتانية متاخدش حاجة خالص..دا مش عدل الصراحة

نوال: أنا سمعت انه طلقها غيابى لأنها كانت بتغير عليه اوى وعملاله مشاكل فى كل حته

عماد: ياجماعة نهدى شوية عشان نعرف الحقيقة ..هى فوزية كانت بتحب ابن خالتها وللا جوزها اللى بتغير عليه وعملاله مشاكل.. وهو أصلاً طلقها وللا اتجوز عليها،وكمان عاوزين نعرف وضع مراته الأولانية ايه بالظبط دلوقت..يكونش رجعها من ورا مراته الجديدة اللى هى فوزية؟

نوال: تصدق ممكن ياجوز بنتى..عارفين مين اللى هتعرفلنا الحقيقة؟

نهى: مين يا ماما؟

نوال: منار بنت اختها نجلاء..نتصل بيها تيجى

عماد: طاب نستأذن احنا بقي ولما تيجى منار ابقوا اتصلوا ب مها و بلغوهابالأخبار..يللا يا مها

مها: استنى ياعماد ..منار ساكنة قريب من هنا..هتيجى حالاً

عماد: يللا ياختى..بلا منار بلا اعتماد...ضيعتوا يومنا وشيلتونا ذنوب ..الله يخرب بيوتكم..يارب تتطلقوا كلكوا

مها: عماد...انت جرالك ايه..تعالى ياعماد

عماد : انا ماشي..وشوفى حد يوصلكوا..جاتكوا داهية تاخدكم

عنايات: هو ماله..بيعمل كده ليه ياختى؟

 مها: معلش ياعمتى ..حقك عليَّ..اصل أعصابه تعبانه

نوال: أيوة ياختى دا حتى بيتعالج عند دكتور نفسانى

عماد : وكمان طلعتونى مجنون..طيييب 

مها: عماد..يا عماد...رد علىَّ..دا مشي..هنروح ازاى بقي ؟

نوال :يللا فى داهية..دا حتى كان كابس على نفسنا مش عارفين نتكلم

مها: على رأيك يا ماما..هاه مين فيكوا معاها رقم تليفون منار

****يتبع****