يوميات زوجه صايمه ٤ الحلقة ٤

عماد: مها 

مها: ايوة ياحبيبي خير بتنادى عليَّ

- ايه ده ؟!

- مالك ياعماد انت بتبصلى ومستغرب كده ليه؟

- أصل من يوم ما اتجوزنا أول مرة أنادى عليكى وتردى على طول ..لازم صوتى يتنبح

- انت كنت عاوز حاجة؟

- اه..القميص البيچ فين

- أهو يا روحى مغسول وجاهز ومكوى ..اتفضل

- طاب والكوتشى الاسود

- أهه كنت بمسحه ..اتفضل

- مها ياحبيبتى..انتى عيانه؟

- لا يا قلبي انا كويسة بتقول كده ليه؟

- أ ..أ..أبداً ...مفيش...طاب عاوزة حاجة من السوق او السوبر ماركت

- اللى تقدر عليه يا حبيبي هاته والحمد لله على كل حال

- لأ بقي..انتى فيكى حاجة متغيرة النهاردة..مالك يامها..انتى حاسة بحاجة بتوجعك

- برضه أتعب وانت جنبى ..انا زى الفل ..تمام والحمد لله

- وإيه ده..دى الأوضه مترتبة والغسيل مطبق والدنيا فله وريحه البيت معطر ومطهر ..ايه الجمال ده

- دى أقل حاجة أعملها لجوزى حبيبي

- انتى كمان بتلبسينى الجزمة..انتى متأكدة انك كويسة..صارحينى ..حاسة بسخونة او تعب ..يابنتى لو تعبانه قوليلى ..ليكون الوباء اللى بيقولوا عليه جالك

- ربنا يبعد عننا المرض

- اللهم آمين ..طيب بقي انا خارج

- مع ألف سلامة يا روحى ربنا يكتبلك فى كل خطوة سلامة ..ربنا يكفيك شر العين ..مع ألف مليون سلامة يا روحى

- لأ بقى ..انتى النهاردة مش طبيعية وأنا مش خارج غير لما أعرف فيه ايه 

وبعد قليل:

عماد: مها ياحبيبتى .. انا مضطر انى اروح ازور خالتى النهاردة لأنها تعبانه اوى وماما واخواتى هناك واحتمال نفطر هناك..ع العموم لو حابه تيجى معانا براحتك ولو انى عارف انك مش بتحبى تروحى هناك

مها: ليه بتقول كده ياعماد ياحبيبي ..دا واجب وخالتك دى زى مامتك تمام وماله لماتروح دى صلة رحم ومفيهاش حاجة لو انا والعيال رحنا معاك

- انتى بتتكلمى بجد؟! أنا مش مصدق دى مها مراتى ..اللى كانت بتتعصب وتزعق لما أجيب سيرة حد من أهلى ..انا فرحان اوى

- يا ابنى أهلك دول أهلى..وعيلتك هى عيلتى

- طاب وولاد خالتى اللى كانوا بيدايقوكى ويغلسوا عليكى 

- معلش ياحبيبي ..ربنا يهديهم

- يعنى هتيجى معايا..دى ماما واخواتى هيفرحوا أوى

- طبعاً ياحبيبي هاجى بس الدوشة بتاعت العيال مش هتتعب خالتو

- اه..تصدقى فعلاً ..خلاص ابعتيهم ل مامتك

- انت تؤمر ياروحى..ولو ان ماما تعبانه هى كمان ورايحه عند الدكتور دى حتى طلبت منى اروح معاها واعتذرت قلتلها لما آخد رأي عماد الأول

- معقول يامها..دى عاوزة رأى..روحى لمامتك طبعاً

- طاب وخالتو..مقدرش أتأخر عنها..دا واجب

- قلتلك اسمعى الكلام وروحى لمامتك وأنا هروح لخالتى 

-بس دا معاد الدكتور بكرة الصبح وكمان الولاد هيعملوا دوشة ويتعبوها

- الولاد سيبيهم معايا وانا هتصرف وافطرى مع ماما

- بس دا تعب عليك ياحبيبي

- ايه اللى بتقوليه ده؟ أهلك هما أهلى

- الحمد لله ان ربنا أكرمنى بزوج زيك..ربنا يخليك ليَّ ولا يحرمنى منك أبداً

- ويخليكى يا روحى ..خدى بقي فلوس خليها معاكى احتياطى

- لأ مش مهم ،وأنا هجيب ايه يعنى

- لاااا...خدى بالزيادة يمكن تحتاجيها

- خلاص أمرك بقي

وفى اليوم التالى

عماد: والله يا ماما لو شفتى مها دلوقت ماهتعرفيها ..دى اتغيرت خالص بقت هادية ووديعة ومطيعة جداً 

فتحية: والله يا ابنى انا ماقادرة اصدقك..أصل ديل الكل......

- لا ياماما والنبى ماتغلطى فيها..دى بقت حاجة تانية صدقينى

- آدينا رايحينلها عند أمها و هنشوف ياحبيبي..ربنا يهدى 

- آدينا وصلنا أهه..يللا اطلعى السلم....هاتى ايدك...على مهلك ياست الكل..بالراحة..استنى بقي أرن الجرس..دا باين عليه بايظ هخبط الباب أحسن

- خبط تانى يمكن مش سامعين

- أهه بخبط ..انا سامع دوشة وكلام ..شكلهم مش سامعين الباب

- اه وانا سامعه صوت مراتك بتضحك..هى دى اللى بقت هادية ووديعة ..دا صوتها جايب آخر الدنيا..استنى كده اسمعها بتقول ايه؟

- يا ماما عيب كده..وبعدين احنا فى رمضان

- بس ياواد بلا رمضان بلا شعبان..استنى خلينى اسمع بنت نوال دى بتقول ايه

*********

صوت مها: بس يا واد ياعصام أنا مثبتالك عماد جوزى حته تثبيته ..ليل ونهار مش بقوله غير حاضر ونعم وصوتى هاااادى 

نوال ( مامت مها): احكيله يا مها ...دا انت هتموت من الضحك ياعصام ياابنى ههههههه احكيله على حوار خالته

عصام( اخو مها): مالها خالته

نوال: قالها خالتى عيانه هروح ازورها راحت مها قالتله وماله ياروحى هههههه ...مش قادرة أكمل والله ماقادرة من كتر الضحك..احكيله انتي

 دى خلته يروح وياخد العيال كمان معاه هههههه..وبتاخد منه كل اللى هى عاوزاه

عصام: مها أختى ميتخافش عليها أبداً طول عمرها ناصحة

******

وعلى الباب

فتحية: عماد إنت سامع اللى أنا سمعاه

عماد : يا ولاد الكلب 

- إهدى ياحبيبي..عشان بس تبقي تسمع كلامى

-أنا هدخل أجرها من شعرها وأدبها

- لأ لأ..اعقل كده

- اومال اعمل ايه ياماما؟

- احنا نخبط لحد مايفتحوا وندخل نسلم ونقعد نهزر ونضحك ولا كأن فيه حاجة..عادى.. وفى الآخر تقول لمراتك كلمتين بس وسيب الباقى علىَّ انا

- كلمتين ايه؟

- قولها ماما هتقعد معانا يومين

- هو دا الكلام

*****يتبع*****