يوميات زوجه صايمه ٤ الحلقة ٢

مها: صباح الخير ياعماد

عماد: صباح النو..... انتى بتهببى ايه ع الصبح

- إيه بصورك وانت نايم

- انتى مجنونة وللاعندك حاجة فى مخك ليل ونهار تصورى فى نفسك وفى العيال وفىَّ..انتى بتعملى ايه بالصور دى كلها؟!

- يعنى هكون بعمل ايه يعنى بنشرها على صفحتى فى الفيس

- ما انا عارف انك بتنشريها على صفحتك.. بس ايه الداعى ل دا كله..يعنى لازم الناس تعرف كل أخبارنا ..بطلى شغل جنان بقى وروحى اعمليلك حاجة مفيدة ..دا انا كل ماافتح الفيس ألاقيكى ..مها تشعر بالفرح وربع ساعة بالظبط ألاقى مها تشعر بالغضب وساعة تانية وألاقى مها تشعر بالمرض...اللى هو ازاى يعنى؟ اومال مش بتشعرى غير بالنكد معايا ليه؟؟

- انا نكدية ياعماد ! وبعدين انت زعلان ليه؟! ..انت حد جه عندك

- انتى لسه بتصورى ..انا بكلمك..سيبى الزفت دا من إيدك..ورينى بتعملى ايه؟

- سيب التليفون ياعماد هتبوظ البوست

- ورينى بلا بوست بلا نيلة..يا نهارك اسود ..إيه اللى كتباه ده؟!....لو جوزك صاحى من النوم بالمنظر ده وبيتخانق معاكى؟

- ايه يابنى دا بوست عادى..ودا جروب نسائى على فكرة يعنى مفيهوش رجالة

- انتى بتشهرى بيا !!

- انت حد يعرفك أصلاً ..مالك مكبر الموضوع كده ليه؟

- امسحى اللى كتباه دا حالاً وروحى اعملى الفطار العصر على آذان وشوفى العيال اللى قطعوا بعض بره دول ..بدل ما اقوم اكسر التليفون على دماغك، وامشي من قدامى دلوقت احسن ارتكب جناية

- على فكرة انت عمرك ما اتكلمت معايا كويس وللا قلتلى كلمة حلوة كله شخط ونتر دى مبقتش عيشه دى

- وانا نفسي تختارى الوقت المناسب اللى تتكلمى فيه ..احنا ف ايه وللا ف ايه ومين اللى بيستفزنى أصلاً..روحى يامها دلوقت انا مش ناقص ..انتى عرفانى لمابتعصب ..اللهم انى صايم 

-خلاص..خلاص..همشي 

وبعد قليل

عماد: مها يامها..انتى بتعملى ايه عندك؟ انتى مش سمعانى وللا ايه..انتى بتكتبى بوستات تانى 

مها: عماد...انت واقف هنا من امتى؟ 

- من اول ماكتبتى مها تشعر بالحزن هههههه

- وانت بتضحك ومبسوط اوى كده ليه؟ وهو مين اللى خلانى اشعر بالحزن ...مش انت؟!

- طاب حقك عليَّ ..ياعبيطة انا عاوزك تبقي أكبر من كده..دا شغل عيال

- انا بتسلى ياعماد ما احنا قاعدين بقالنا ييجى شهر مع بعض فى البيت بسبب الحظر وزهقنا يا أخى

- برضه حد يزهق من نفسه 

- ياسلاااام

عماد يهمس: سامحنى يارب

-مها: انت بتقول ايه..سمعتك على فكرة

- بقول يارب يخليكى لينا ولايحرمنا منك أبداً..قومى بقى زى الشاطرة كده..اعملى الفطار عشان مفيش وقت..يللا ياماما ربنا يهديكى وابقي غيرى البوست ده واكتبى مها تشعر بالفرح هاه

- وهيجى منين الفرح معندناش أكل النهاردة

- نعم ياختى ...اومال هنفطر ايه

- اى حاجة ياروحى جبنة ..تونة...وفيه باقى أكل من امبارح

- انتى عارفه انى مبحبش الأكل البايت ..مها...لمى الدور بلاش تستفزينى كل شوية احنا لسه فى اول رمضان

- الله وانت بتتعصب عليَّ ليه؟ ما انت لسه صاحى فى العصر وعارف ان فيه حظر وعلى ماتفوق وتلبس يكون اليوم خلص، وانا هعمل أكل منين؟

- ماقلتيش ليه من امبارح ..انا صحيت بدرى وسألتك ستين مرة عاوزة حاجة من بره قلتى لأ

- يووووه...وانا هفتكر ايه وللا ايه يعنى...أقطع نفسي

- لا ياحبيبتى ...سلامتك ...أتحرق انا

- وبعدين ماانت فاضى وقاعد لاشغله ولا مشغله ...اطبخ انت

- نعم ياختى...دا لماتبقي متجوزة تفيدة...اوعى غورى من وشي ...آل اطبخ آال

***وبعد ساعة****

مها: الله ياعماد...ريحه الكبدة اللى عملتها تجنن..اعملنا بقى شوية سلطة جنب الكبده والمكرونة اللى عملتهم

عماد: عشان تعرفى بس الفرق بين طبيخى وطبيخك..وبعدين تعالى هنا ما انا فتحت الديب 

فريزر لاقيت فيه سمك وفراخ وكبده...ازاى مفيش أكل

- مخدتش بالى

- انتى بتهببى ايه..بتصورى ايه؟

- ولا حاجة ياروحى...تعالى يا واد ياعمر عشان اصورك..أُقفى ياحيوانة جنب اخوكى عشان اصورك ..إتعدلى يابت

- كلمينى هنا زى مابكلمك ..انتى بتعملى ايه؟

- ثوانى بس ياعماد هلبس الاسدال النبيتى أتصور بيه قبل المغرب ما يأذن

- مها يا مها ...خدى هنا أنا بكلمك...هاتى يابت تليفون امك لحسن يتكسر.....ايه ده؟؟؟! الفطار أحلى مع أولادى ...جوزى اللى بيعملى الفطار كل يوم...الحظر أحلى مع أسرتى...مين جوزها بيخدمها زيى.....يا مهاااااااااا

***يتبع****