يوميات زوجه صايمه ٢ - الحلقة الاولى

- كل سنة وانتى طيبة ياحبيبتى

- وانت طيب ياعماد ..هاه الفطار عند ماما النهاردة؟

- يعنى النهاردة أول يوم رمضان وماما بتجمعنا انا واخواتى كل سنة .ما انت عارف.. هاه هنروح بقي ياحبيبي؟

- آه ابتدينا موال كل سنة..انتى ناسية جرالنا ايه من ورا عزومه أمك السنة اللى فاتت

- إيه..بتقول اي؟ 

- لا ياحبيبتى ولاحاجة .انت بس عارفه إن مبقيناش لوحدنا السنة دى هتقدرى تروحى المشوار دا كله وانتى شايله"عمر" على كتفك

- إيه ياعماد هو انا هروح ماشية؟

- أنا بصراحة اخاف على ابنى من الجو الحر ده.ماتخليها عندماما السنة دى

- إيه إيه.عند مين؟ دا مشوارها يهد الحيل

- وهو انتى هتروحى ماشية

- بقي كده

وبعد قليل

- عشان خاطرى ياعماد يللا نروح نفطر عند ماما

- يخربيت الزن.. ياحبيبتى الفطار الجماعى ده اتعمل عشان المشاركة والمودة والرحمة بين الناس ووجود الست والدتك مش هيخلى فيه غير المشاكل انتى عارفاها بتخلق من اى حوار تافه مشكلة كبيرة

- نعم نعم وهى يعنى أمك اللى مش بتاعت مشاكل

- خلاص نفطر فى بيتنا منعاُ للإحراج 

- بس ماما مستنيه أرد عليها دى هتتجنن لو مافطرتش معاها

- قوليلها اى حاجة يامها

- لأ مش هقول وهنروح ياعماد

- اللهم طولك ياروح..خلاص اجرى اتصلى بيها وانا هروح أتنيل ألبس بس بسرعة مابقاش غير ساعة ع الفطار

وبعد عشر دقائق

- ايه ده انتى لسه ملبستيش

- أصل...ايه رأيك نفطر مع بعض النهارده..اعزمنى برة 

- ياسلام..طاب وماما

- اسكت مش اتصلت بيا ولاقيتهم معزومين فى فندق فايف ستارز

- والله..تصدقى وانا كمان معزوم برة 

- طاب وأنا

- إفطرى لوحدك..أصل امى هتتجنن لو ماروحتش فكرت معاها

- عماد..خلاص أنا موافقة افطر عند امك...عماد أنا معملتش فطار ياعماد

****يتبع**