عماد: مها يامها..بتعملى إيه عندك؟
مها تهمس: ششش..بتكلم فى التليفون..خلاص ياهاله ياحبيبتى بس إوعى تنسي الجمعية ..ماشي يللا مع السلامة
-جمعية إيه دى يامها..تانى يا مها..انتى مابتتوبيش أبدا
-يوووة إنت فهمت غلط ياأخى دى جمعية هنعملها لواحدة غلبانه بتربى يتامى وعندها بنت مخطوبه وأنافكرت أعملها جمعية أنا واصحابي عشان تجهزها
-بسم الله ماشاء ..وإيه التقوى اللى نزلت عليكوا دى؟
-هههه..آدى اللي إنت فالح فيه..بقولك إيه هتنزل معايا النهارده نسأل على اﻷجهزة الكهربية والمطبخ والسجاجيد
-ليه ..مالنا بيه دا كله؟؟
-دا عشان البت اليتيمه..يابو مخ تخين
-بس من غير طوله لسان..إنتوا مش هتدوها الجمعيه وخلاص
-ياحبيبي فيه ناس نفسها عزيزة والست رفضت فلوس من ناس كتير..إحنا هنجيب الحاجه وندفعها مبلغ صغير كل شهر وشويه ونقولها الجمعيه خلصت واحنا هنكملها مع بعض..هاه هتيجى بقي؟
-ﻻ...مش فاضى
-ياأخى إعمل حاجه لله..إعمل ﻵخرتك شويه
-كفايه انتى بتعملى وبعدين أنا كل مرة بمشي وراكى فيها بروح فى داهيه
-كده ياعماد..طاب والله......
-خلاص ماتحلفيش..أنا جاى ..بس والله لو عملتى مشكلة ﻻ أسيبك وأمشي
-ودى جدعنه منك؟؟
-هو كده
-ماشي..تعالي وربنا يستر وأنا هحاول أمسك أعصابي مع البياعين
وفى المساء
-الحمد لله..آدينا عرفنا اﻷسعار واتفقنا مع أصحاب المحلات من غير مشاكل
-عاقله من يومك ياحبيبتى
-هههه..دمك خفيف..إيه دا ..شايف ياعماد
-إيه فيه إيه؟
-هناك..شايف الراجل اللي بيضرب إبنه ده..دا هيموته!! إجرى حوش عنه
-واحنا مالنا أب وبيربي ابنه..ايه اللي يدخلنا
-ياعماد حرام عليك..دا الواد هيموت فى إيده..إعمل حاجه صح واحدة فى حياتك
-يوووة خلاص هتنيل أروح
وعندما وصل
عماد: إيه ياعم مش كده..صلى ع النبي
الراجل: عليه الصلاة والسلام..الواد ابن الكلب ده تانى مرة يضيع مفاتيح الموتسيكل بتاعي..انت ياض..ازاى تضيع المفاتيح..أومال واقف بتحرس إيه يابن ال....
الولد: خلاص يا بابا ..آخر مرة..وقعت منى غصب عنى والله..آسف يا بابا آاااى...آاااى
الراجل: أعمل إيه أنا بآسف دى ..أصرفها منين دلوقت والله ماانا سايبك النهارده غير لما تتعلم اﻷدب
عماد: ياأستاذ كفاية حرام عليك دا ولد صغير مش كده؟؟
الراجل: صغير دا عنده ستاشر سنه وعندى أربعه زيه فى البيت بعلف فيهم وفى اﻵخر آدى اللي بناخده من العيال..ياواد انطق..وديت المفاتيح فين؟
مها: ياراجل انت حرام عليك..لميت الناس وبهدلت الواد..ايه القسوة دى؟
الراجل: دا عيال وﻻد...جابولى السكر والضغط
عماد: معلش إهدى شويه..خلاص دوروا ياجماعه ع المفاتيح
الراجل: يابيه أنا دورت كتير بقالنا ساعتين ع الحال ده..(والتفت الى ابنه) عاجبك ياابن الجزمه تعطيل المصالح ده
عماد: طاب انت ساكن قريب؟
الراجل: حضرتك أنا تاجر والعربية دى بتاعتى
عماد: التويوتا دى؟
الراجل: آه بحمل عليها البضاعه
مها: خلاص..ياعماد انتوا تشيلوا الموتسيكل وتحطوه فى العربية
الراجل: بس كده هنتعبكم ياجماعة
عماد: ﻻ وﻻتعب وﻻ حاجه..إيدكم معايا يارجاله
الراجل: والله مابييجى من ورا العيال غير وجع القلب..متشكرين يا رجاله..يللا يابن ال.....سلام عليكم ياجماعه متشكرين والله
عماد: ﻻ شكر على واجب..الحمد لله إتسترت
مها: شايف لما تعمل خير بتبقي مبسوط ووشك منور ازاى..ﻷ وإيه بتحس براحة نفسية رهيبة
عماد: تصدقى فعلا أنا نفسيتى أحسن بكتير..بس الراجل ده قاسي أوى على ابنه
وبعد دقائق
مها: عماد فيه واحد بينده عليك
الرجل: يا استاذ يا أستاذ
عماد: أيوة فيه حاجه حضرتك
الرجل: الموتسيكل اللي كان هنا فين؟
عماد: آه حضرتك خده صاحبه
الرجل: صاحبه مين ؟أنا صاحبه
عماد: ازاى حضرتك أنا والرجاله شيلناه وحطيناه فى عربيه الراجل اللي كان هنا
مها: أيوة فعﻻ حضرتك الراجل اللي ابنه ضيع المفاتيح
الرجل: مفاتيح إيه؟ المفاتيح معايا أهه..راجل مين..ورجالة ايه اللي شالوه؟
عماد: الرجاله اللى كانوا هنا..حتى..حتى اسأل حضرتك المدام..المدام بتاعتى....يامها...مها
الرجل: مها مين؟انت بتتحامى فى واحدة ست
عماد: هى راحت فين دى؟مها
الرجل: أنا مش هسيبك النهاردة ..تعالى ع القسم..لما أشوف شيلته وحطيته فى العربية ازاى يابن ال...
***تمت***
#سهير_عسكر
2
-2
