-صباح الخير يا دنيا

- صباح النور يا رمضان..أجهزلك الفطار

-إيه ده؟؟ هو الواد ضياء غايب من مدرسته ليه..إنت يللا يابن ال....

- سيبه يارمضان.. مالك؟ قافش فيه كده ليه؟؟ إنت ماسك حرامى

-الواد ده غايب ليه من مدرسته يادنيا...إيه ده وكمان ملك...الله..الله.إيه اللى بيحصل فى البيت من ورايا يا دنيا ..العيال دى سايبه مدارسها النهاردة ليه؟.. إوعوا تكونوا بتدبرولى حاجه

- ندبرلك دا إيه؟ يعنى هيحصلك إيه أكتر من اللي انت فيه..إنت نسيت ان النهاردة أجازة

- أجازة بمناسبة إيه؟ سته أكتوبر كان إمبارح

- خلاص تبقي أجازة سبعة أكتوبر

- ياسلام..انتى بتهزرى

- والله بتكلم جد

- كده..طاب إوعى ياختى من وشي خلينى أتوضى

وبعد قليل

-رمضان. يا رمضان. انت يا اللي اسمك رمضان 

- إيه..فيه إيه ياوليه

- ماانت سامعنى أهه..أومال مش بترد عليا ليه

- نعم ..عاوزة إيه من سي زفت

- إنزل هاتلنا عيش وخضار للغدا

- وولادك فين ياست هانم..هما مش فى أجازة

- راحوا كلهم النادى

- نعم يعنى هما يروحوا النادى وأنا اللي أخدم عليكم

- الله..بيفكوا عن نفسهم شويه..قوم بقي ..وإيه اللى بتتفرج عليه ده؟ دافيلم بقاله يجي ميت سنة..دا انت قديم أوى..هات الريموت هات خلينى أتفرج شويه قبل ما إياد يصحى

- دا فيلم عن حرب أكتوبر يا جاهلة

- ياخويا بلا حرب بلا بتاع..هات الريموت

- خدى ياختى..أنا أصلا كنت داخل أنام

- تنام دا إيه؟ ومين اللي هيجيب الطلبات..طاب أعمل الغدا ازاى أنا..والعيال هييجوا جعانين وكمان عازمين أختك هيام ع العشا و...

- بس خلاص إيه..افصلى شويه..هاتى الفلوس،وخدى الزفت الريموت أهه

- أيوة كده..خد هات خضار وفراخ وعيش وفاكهه..عاوزين موز وتفاح وعنب وإيه كمان يا دنيا..آه عدى بقي على زينب جارتنا وانت جاى قولها المدام بتقولك فين الجمعية بتاعة الشهر ده؟ ..آه مااحنا مش فاتحينها تكيه ..تصور الوليه بقالها شهرين مادفعتش الجمعية

-إنتى إتهبلتى ..أنا هلملك جمعيات كمان طاب والله ماانا جايب حاجة 

- رمضان يارمضان..طاب والغدا ..أعمل إيه أنا ياربي دلوقتى

وبعد ثلاث ساعات

-حمد الله ع السلامة ياهانم

يتبع