يوميات دنيا و رمضان الحلقة الرابعة

وبعد ثلاث ساعات 

- حمدالله على السلامة ياهانم

- أوووف خد شيل عنى ..ضهرى إتقطم من الشيل ..سلامتك يادودو ياحبيبي ..بس ياحبيب ماما ..برضه يارمضان تسيب الواد يعيط كده..أسيبه شويه أرجع ألاقيه مموت نفسه من العياط..داانا سامعه صوته من ع السلم ..إيه مفيش إحساس بالمسئولية 

- هو مين اللي يقول الكلام ده..إنتى ازاى ياست انتى تسيبى الواد نايم جنبى وتنزلى

- الله ..أومال مين اللى هيجيب الطلبات ..آه يانا ياغلبي محدش حاسس بيا خالص ..كلكم واكلين شاربين نايمين مش حاسين بالنار اللى جوايا،وأنا متبهدلة وشايلة الهم لوحدى

- أيواا..إفتحيلى فى إسطوانة كل يوم ..بقولك إيه أنا خارج وسايبهالك مخضرة..الحمد لله وآدى عيالك وصلوا أهم..إنت ياواد يامعتز هات فلوس الحصة اللى إتلغت امبارح لحد ما أفك

-معتز: صرفتها فى النادى يابابا

رمضان: كده..طاب هاتى يانهله الفلوس اللى كنتى هتشترى بيها الجزمه لما أرجع أديهالك

نهله: شحنت بيها التليفون يابابا

رمضان: يانهار أبوكى اسود شحنتى ب ٤٠٠جنية ..ليه بتكلمى مين يا بت دنيا؟

دنيا: يعنى هتكلم مين يا حسرة؟

رمضان: انتى تخرسي خالص ..تعالى يابت وهاتى تليفونك

دنيا: ماخلاص بقي يارمضان ..روح عشان ماتتأخرش وبعدين نتكلم

رمضان: أنا قلت تخرسي خالص،وبعدين هتأخر على إيه؟..انتى بتشاوريلها ليه؟

دنيا: ههههه ولا حاجة ياخويا

ضياء: أقولك بتكلم مين يابابا

دنيا: إنت يا واد إتلم أحسنلك

رمضان: أنا باين عليا بقيت طرطور فى البيت ده يادنيا..خد ياواد يا ضياء أختك بتكلم مين؟

ضياء: هات ١٠٠جنية وأنا أقولك

رمضان: ميت عفريت يركبوك يابن ال....شايفة دى آخرة تربيتك ودلعك فيهم..إجرى هاتيلى الفلوس اللى شايلها فى الدولاب ولما أرجع هيبقالى حساب معاكم كلكم ياغجر

دنيا: دولاب إيه ياخويا؟

رمضان: الدولاب اللى فى أوضتنا..الفلوس اللى شايلينها للظروف

-آاااه..انت لسه فاكر ماصرفتها من زمان

-إيييييه؟...صرفتى ٣٠٠٠جنية يادنيا

- وهى دى فلوس ..طاب دى فاتورة الكهربا لوحدها الشهر ده جاية ب٥٢٠جنية

-ليه؟؟..دا انتوا لو بتكهربوا بعض مش هتدفعوا المبلغ ده؟

-وأنا مالى ما الوصل عندك أهه

-وباقى ال٣٠٠٠ فين؟

-أنا عارفه أهو دروس ومصاريف ولبس وكده يعنى

-إنتى بتستهبلي!!طاب يللا بقي على بيت أبوكى،وماترجعيش تانى..أنا قرفت خلاص

- والله يكون أحسن..على الأقل ارتاح منك ومن عيالك

معتز: والله دى تبقي أحسن مصلحة عملتهالنا يا معلم..ياريتها تقعد هناك سنه وللا اتنين

نهله: ابقى كلمينى ع الواتس يا ماما..تييك كيير

ملك: هييه..هييه..ماما هتمشي..ماما هتمشي

رمضان: ياولاد المجانين

***تمت**