"مى" تصيح: الدكتور وصل..الدكتور وصل..اتفضل يادكتور
آدم : هاتيلى القهوة بسرعة وتعالى عايزك
_ حاضر يادكتور
وبعد دقائق
آدم : إيه يابنتى الجو القديم اللى انتى عملاهولى فى العيادة ده..انتى بتزعقى ليه لمابدخل العيادة،وتنادى الدكتور وصل ماتمسكى ميكرفون أحسن
_ بسيطك يادكتر
_ بتسيطينى! طاب روحى دخلى الكشف ،واسمعي أما اقولك
_ ايه؟
_ إوعى تفاجئينى بحاجة جديدة النهاردة..الكشف اللى أحس إنه محتاج وللاحد ظروفه صعبة هعمله تخفيض أو أخليه مجانى .لكن متتصرفيش من دماغك تانى
_ امممم
_ مالك..ماتردى
_ حاضر يادكتور.حاجة تانية
_لأ..روحى بقي
"مى" بصوتٍ عالٍ :
_ الكشف رقم واحد يدخل
آدم بغضب : إيه يابنتى احنا فى موقف عربيات هنا..وطي صوتك ده
وبعد قليل تدخل سيدة شابه وابنها
آدم : خير حضرتك الكشف لمين بالظبط
_ ابنى يادكتور ..عنده حالة غريبة اوى
آدم : خير..تعالى ياحبيبي.اطلع ع السرير ده.هوووبه..شاطر ...قولى بقي يابطل انت فى سنة كام
الولد : كى جى تو
آدم : شاااطر نام بقي وهحطلك شامبو على بطنك عشان نشوف فيها إيه
يلتفت للأم
_ بيشتكى من إيه حضرتك؟
_ موضوع الترجيع ده قالقنى أوى يادكتور
_ ورينى كده ياحبيبي..طاب وفيه سخونه أو اسهال مع الترجيع
_ لايادكتور . .حضرتك فهمت غلط..دا من يوم ما إتولد مرجعش
_ نعم..بتقولى إيه
_زى مابقولك يا دكتور عكس اخواته خالص دايماً بيرجعوا لما يتعبوا أو ياخدوا برد ..لكن هو لأ.تفتكر دا طبيعى يادكتور
توقف آدم عن الكشف
_دا معناه إن صحته كويسة يافندم
_ كويسة ازاى بس يادكتور دا عمره مارَجَع
_ ياستى وفيها إيه ..هو لو العيل رجع تزعلوا ولو مرجعش تزعلوا..ابنك تمام ومفيهوش حاجة
_ يعنى إيه؟
_ يعنى تاخدى إبنك وتمشوا وتاخدى معاكى تمن الكشف ابنك سليم مفيهوش حاجة
_ مفيهوش حاجة ازاى بس
_ يعنى أديله حاجة تقلب معدته تخليه يرجع عشان ترتاحى
_ إيه!..إنت باين عليك مجنون..إنت عاوز تِسم الواد..يللا يابنى نروح لدكتور شاطر أنا اللى غلطانه إنى جيت هنا..يللا ياحبيبي..قال تقلب معدته قال
وبعد دقائق
مى : هى الست دى مالها .طالعه تقول دا دكتور مبيفهمش
آدم : ولاحاجة..إدتيها تمن الكشف ؟
_ أيوة
_ طاب دخلى اللى بعده واعمليلى كوباية شاى عشان عندى صداع
وبعد قليل دخل أحد المرضى شاب وفى يده أوراق
المريض : دي التحاليل اللي حضرتك طلبتها
_ تمام
وبعد فحصها
_الحمد لله زى ماكنت متوقع..التحاليل كويسة يا أستاذ هماشوية أنيميا بس نسبة بسيطة يعنى حاجة متقلقش خالص
_ يعنى ايه يادكتور..دا تحليل بول وبراز وسكر وصورةدم كاملة،وكل ده وفى الآخر شوية أنيميا بس
_ أومال انت عاوز ايه يعنى ؟!
_ شوف كده كويس يمكن يكون فيه حاجة تانى
_ مفيش ياابنى تحاليلك كلها كويسة مش تقول الحمد لله
_ الحمد لله وكل حاجة يادكتور بس المصاريف دى كلها وشوية أنيميا بس،وبعدين لماحضرتك كنت عارف إن مفيش حاجة بتخلينى اعمل ليه كل التحاليل دى
_ أنا مكنتش عارف..كنت شاكك بس،واطمنت
_ يعنى أنا أصرف دا كله عشان إنت تطمن!
_ لا حول ولاقوة إلا بالله..يعنى أخترعلك حاجة يابنى دا بدل ماتفرح
_ أفرح بإيه ؟! بالمصاريف ..إنت عارف انا جبتهم منين؟
_طاب متزعلش خد تمن الكشف وانت طالع
_ ودا ييجى إيه فى اللى صرفته
_ يعنى أعملك ايه؟..إيه الناس الغريبة دى!
_خلاص يادكتور..انت بتزعقلى ليه؟
_ياسيدى مش بزعق إتفضل خد تحاليلك وامشي
خرج المريض وهو يصيح :
_ايه الدكتور الغريب ده ! كل المصاريف دى وكمان زعلان
مى تقاطعه :
_ خير يا أستاذ
المريض: لما هو عارف إنه مفيش حاجة بيخلينى اعمل كل التحاليل دى كلها ليه.. هاتى يابنتى الكشف
_ كشف إيه؟
_ الدكتور قالى خد تمن الكشف ..هاتى بقي خلينا نغور من هنا
مى تعطيه المال وتدخل ل آدم وتقول بعصبية :
_ يا آدم مينفعش كده..مش كل واحد يصعب عليك تديه فلوسه كده مش هينفع
_ بقولك إيه..أنا مش ناقصك ،إطلعى برة واعمليلى كوباية زفت
_ دى خامس كوباية شاى تشربها فى أقل من ساعتين
_ وانتى مالك..غورى بقي
مى بعصبية :
_ حاضر..ماشي يا آدم
آدم يقاطعها :
_ إسمى الدكتور آدم
مى تهمس :
_ياشيخ إتنيل
وبعد قليل يدخل رجل مُسن
آدم : إتفضل يا والدى..خير بتشتكى من إيه؟
المريض: مغص على طول وألم فى الحته دى
_ آه طاب ورينى كده..هنا..وللا هنا
_ لأ فى الحتة دى بالظبط ..أيواااا اللى تحت إيدك دى بالظبط
_ آه دا القولون ياحج
_ ماانا عارف يابنى وباخدله علاج
آدم بإندهاش
_ والله! أومال حضرتك جايلى ليه؟
_ أصل الدكتور محسن اللى فى العيادة اللي هنا فى العمارة ..اللى فى الدور السادس..عارفه ياابنى؟
_ اه طبعاً دا أستاذنا
_ أنا بقي متابع معاه،وقالى دا القولون العصبي،وباخد العلاج ده..إتفضل شوفه
_ ورينى كده..اه تمام..طاب ايه المشكلة؟
_ المشكلة إن معاد الإعادة النهاردة وهو مش موجود ،ولاقيت ولد صغير على باب عيادته قالى إن الدكتور محسن موجود تحت فى الدور التانى ،ولماجيت الممرضة اللي بره قالتلى إن حضرتك أشطر منه،وهتعالجنى بسرعة ..إكتبلى بقي على حاجة تخففنى بسرعة يادكتور
_ أولاً مفيش حاجة اسمها تخف بسرعة فيه حاجة اسمها تاخد العلاج وتلتزم بالتعليمات ،وتانى حاجة أنا مش اشطر من الدكتور محسن كلنا بنجتهد
_ يعنى إيه ياابنى؟
_ يعنى أنا شايف ان حالتك مستقرة ..يعنى هتمشي على نفس العلاج لحد ماترجع للدكتور محسن
_ إيه الكلام دا ياابنى؟
_ زى ماسمعت ..إطلع ياحج خد تمن الكشف بتاعك من الممرضة
يخرج المريض وهو يقول:
_ أومال بيقولوا شاطر ازاى
وبعد قليل تدخل مى:
_ إيه اللى انت بتعمله ده؟ دا رابع كشف نرجع تمنه ،وكنت زعلان اوى ع اليوم المجانى
_ إيه اللي بتهببيه ده..هى حصلت يا مى تسرقى مرضى الدكتور محسن وتجيبيهم هنا
_ وفيها إيه يعنى؟
_ دى خيانه ونصب
_ آهو المثالية بتاعتك دى هى اللى هتوديك فى داهية ..إنت لسه بتبدأ حياتك يعنى لازم تشغل دماغك شوية
_ أشغل دماغى وللا أنصب ع الناس..إنتى هتوقفى حالى ،وهتبوظى سمعتى بعمايلك دى ..مين اللى قالك ع الفكرة دى؟ ..هاجر؟
_ لا والله..دى فكرتى انا لوحدى
_ اه...طاب طالما فكرتك واجتهادك لوحدك..يبقي مخصوم منك نص شهر
_ ليه حرام عليك
_ إيه بتقولى إيه؟ كلمة زيادةوهخليه شهر
مى تهمس :
_ ياريتنى قلتله انها فكرة هاجر.نص شهر بحاله..منك لله يا آدم
***يتبع***
2
-2
