فى المستشفى يسير آدم فى الممر مسرعاً

رجل الأمن: صباح الخير يادكتور آدم..الدكتور شاكر عاوز حضرتك

آدم: صباح النور..تمام

موظف الاستقبال: صباح الخير يادكتور..الدكتور شاكر بيسأل على حضرتك

آدم: صباح النور..ماشي

الدكتور محمد: صباح الخير يا آدم.الدكتور ش...

 يقاطعه آدم: ماشي ياعم خلاص عِرفت

وفى غرفة الدكتور شاكر مدير المستشفى

شاكر: حمد الله ع السلامه..ايه يا آدم كل دا تأخير 

آدم: معلش يادكتور زحمه الطريق..خير..المستشفى كلها قالتلى انك عاوزنى

_ وحضرتك قافل تليفونك ليه؟

_ مش قافله ولاحاجة ..أهه

_ طيب خلاص..فيه عينات متأخرة ولازم تروح تمضيلنا الورقة دى من الوزارة..عشان الدكتورة أمل مش موجودة 

_ الله ما انا لسه مخلصها الشهر اللى فات عشان كانت غايبة برضه

_ إنت كمان جاى متأخر وبتتكلم..إتفضل الورقة أهى ،وللا انت فاكر إنك عشان جوز أختى همَيزك عن حد ..لا تبقي غلطان ياكتور دا شغل

_ بقولك إيه انا مش ناقص ع الصبح.مش أسيب اختك فى البيت ألاقيك انت هنا..هات الورقة خلينى ألحق الوزارة

وبعد ساعة 

فى وزارة الصحة

موظف: الورقة دى عند مدام هيام فى الدور التالت

مدام هيام: خير إيه ده؟

آدم: دى استمارة صرف العينات الجديدة

_ اه..طاب روح دلوقت وتعالى بعد شهرين خدها

_ ههههه..قصد حضرتك يومين

هيام بعصبية: أنا قلت شهرين

_ ليه حضرتك أنا خلصتها قبل كده فى يومين بس

_ الوزارة حضرتك اتنقلت للعاصمة الإدارية واحنا هنا بنشتغل يومين فى الاسبوع بس

_ طاب تمام..أنا بقي آخد الاستمارة دى وأروح بيها العاصمه وأخلصها هناك..عشان الوقت بس حضرتك

_ مينفعش يادكتور

_ ليه بس يامدام

_ عشان لازم الاستمارة ترجع تانى هنا نأشر عليها ونختمها..شايف الختم اللى هناك ده( وأشارت بالسبابة) بعد ما الاستمارة تخلص هناك نرجع نختمها بالختم ده ونرجعها تانى العاصمة نمضى بالموافقة ،وترجعلنا تانى وحضرتك تستلمها 

نظر آدم إلى الختم دقائق .ثم التقطه ووضعه فى جيبه،ونظر إليها قائلاً :

_ خلاص..تاهت ولقيناها أنا هاخد الختم معايا ،واروح أمضى واختم وأرجعه لحضرتك تانى هنا

إنتفضت هيام ووقفت مذعورة تصرخ بوجهه: 

_تاخدإيه يا دكتور..انت عاوز تودينا ف داهية ..الختم دا مينفعش يطلع من هنا.دا عُهده ..هاته يادكتور لو سمحت

_ حضرتك زعلانه ليه ..أنا هوفر عليكم المشوار والتعب..طاب هقول لحضرتك على حاجة هاتوا كل الورق والاستمارات اللى محتاجين تخلصوها ،وأنا اروح بالختم أمضيها واختمها واخلصها ،وياستى مش عايز منكم حاجه خالص هههه

_ انت بتهزر..ماتيجى تشتغل مكانا احسن ..سيب الاستمارة هنا واحنا هنخلصها بمعرفتنا ..قال تاخد الختم قال..آدى اللى ناقص،هات الختم ده

_ آهو ياستى الختم هو أنا كلته..اتفضلى( اخرج الختممن جيبه وتركه على مكتبها) وآدى الاستمارة كمان تخلصوها فى شهرين فى سنتين انتوا أحرار..سلام عليكوا

تهمس وهى تضرب بكفيها:

_وعليكم ياسيدى ..مجنون ده!

وبعد ساعة

دكتور شاكر: عملت ايه؟

آدم: يعنى هعمل ايه شهرين وتخلص

_ شهرين! ليه؟

_ الروتين ياسيدى

_ طاب اتفضل على شغلك،واعمل حسابك بكرة هتروح الوزارة تخلصلنا ورق الأشعة اللى متعطل عشان دكتور حسام مسافر

_ الله! هو مفيش حد فى المستشفى دى غيرى ماتبعت حد تانى 

_ الاشعة عطلانه بقالها ٣ شهور ودكتور العظام مش عارف يشتغل 

_ وأنا مالى ابعت أى موظف

إلتقط دكتور شاكر ورقة وقلم وراح يكتب ،وبعدان انتهى أشار بالورقة ل آدم:

_ إتفضل داتكليف رسمى 

_ ورينى كده..إيه؟ عند مدام هيام تانى ..لا طبعاً مش هروح

_ هو إيه اللى مش هتروح..احنا شغالين بمزاجنا وللا انت فاكر إنك عشان جوز اختى هقعدك على مكتب تحت التكييف ومتعملش حاجة.. انت....

_ على فكرة انا مش شغال عندك انا هنا بتكليف من الوزارة ودى مستشفى حكومى وانا ليا اختصاصات محددة

_ وانا مديرك وانا اللى بحدد اختصاصاتك دى ..عشان كده كتبتلك تكليف رسمي..اتفضل

أخذ آدم الورقة واستدار وعندما فتح الباب للخروج

قال دكتور شاكر: 

_ بقولك ايه..متتأخرش بكرة فى الوزارة عشان دكتور الاستقبال مش جاى وانت هتكون مكانه أصله واخد أجازة

نظر إليه آدم بغضب وقال وقد بدا يعلو صوته:

_ نعم..دا لسه كان واخد أجازة الاسبوع اللى فات

_ الراجل تعبان..ايه هندبحه..الرحمة حلوة يا أخى

صرخ آدم:

_ وأنا مين يرحمنى..حسبي الله ونعم الوكيل

***يتبع***