كل التفاصيل بتقول

 إن انت وجودك فارق

وكأنك سايب بصمة

 على قلبي ومهما تفارق

مع إن الواقع فارض 

إن احنا لابد نفارق 

طريقين التقوا ف مَفارق 

هيقضوا الباقي توازي 

بكفاية يا هذا تعازي 

واحفر بدموعك قبرك

قوم طهر إثم مشاعرك 

واتكفن بقماش صبرك

إلى أي اتنين بيفارقوا

أو أي حزين بيعاني

الخطة تكون كالآتي

اسمعني بكل جوارحك

مش وقته نعيد ونهاتي

قوم واقسم على أناتك 

ولنفسك سوط واجلدها 

اكبتها وقلل زادها

قويها ونشف عودها

لو حتى القلب متبت 

وجذور العشق اتمدت

من سابع أرض الحلم 

لحدود السما ف الشوق

فاهمين مأساتك جدًا

وهنعمل إيه في قدرنا

مكتوب نوئد مشاعرنا

ونكمل عادي حياتنا

ويجوز نرتاح في الآخرة

وبيقولوا الآخرة محال

إبليس من عشمه ف بكرة 

قاعد يوعد بالجنة

وأنا وانت على الأعراف

بنكفر عن أحلامنا