حقيقة المتفرج

الحق يا عوض

_ فيه ايه يا حامد

بيت اخوك محمد

_ماله 

الراجل اللي جه الحتة من كام يوم ومحدش يعرف له أصل ولا بلد ده دخل على اخوك البيت وشغال ضرب فيه هو وأولاده وبيهدده لا يسيب البيت لا يقتل ولاده كلهم 

_ وانا مالي يا عم انا قاعد في بيتي وطالما محدش اذاني خلاص 

خلاص ايه يا عوض بقولك هيقتل ولاد اخوك ومش بعيد يقتله هو كمان ويعتدي على حرمة بيته

_ يا عم هو قادر يدافع عن نفسه ما انا لو رحت ادافع عنه يمكن اضرب معاه

يمكن تضرب معاه وجايز برضه لما تتحد انت وهو تكونوا قوة وتقدروا تخرجوا الراجل المغتصب ده من بيت اخوك وتعيشوا سوا في سلام، لكن الأكيد إنك لو فضلت ساكت وقعدت تتفرج على اخوك وهو بيتقتل وبيته وعرضه بيغتصب إنت اللي هيكون عليك الدور بعده، فوق يا عوض فوق وقوم حط ايدك في ايد اخوك لحد ما تطردوا المغتصب ده من أرضكم وتعيشوا سوا في سلام قبل فوات الاوان.

هي دي الحقيقة طول ما انت واقف بتتفرج من بعيد وتقول ما انا مش مضرور إنت اللي هيكون عليك الدور في الضرر ده وساعتها هتلاقي برضو اللي يتابع من بعيد ويقول أنا تمام وخلاص.