_فيه إيه يا اسطى

اسطى فيه بنت محترمة تقول لخطيبها حبيبها اللي هيبقى جوزها يا اسطى

_ياعم مالك كدة ما تفكها الحياة مش ناقصة تعقيد

هموت واعرف انت بتجيبي الكلام ده منين يابنتي انت طالبة في كلية الهندسة وكلها كام شهر وتتخرجي ونتجوز وتبقي أم هتقولي ساعتها هتقولي لبنتك يا اسطى وفكك 

_بنت مين يا اسطى أنا عاوزة ولد وهسميه رضا وهقوله يا بلية

ولد وتسميه رضا كمان 

_اه يا اسطى ماله رضا عشان اقوله روح ياض يا رضا وتعال ياض يا رضا

هههههههههههه ده على أساس انه هيبقى صبي في ورشة وانت المعلم بقى وكدة، يا شيخة يخرب بيت اليوم اللي عمي وافق فيه تدخلي ميكانيكا وتبقي عم الاسطى كدة

راحت فين شيماء البنوتة الحلوة الرقيقة اللي كنت بحبها زمان

_كدة يا اسطى يعني انت معدتش بتحبني

لا يا ستي بحبك  بحبك وبموت فيك كمان

_ سيبك انت بس ايه رأيك في اسم رضا 

لا بنت وهسميها ليلى 

_ليلى لا ياعم انا عاوزة ولد وهسميه رضا

سيبك انت من ولد وبنت دلوقتي هتخلصي امتحانات امتى بقى أنا هموت ونتجوز بقى بقالي ٣ سنين مستني 

_خلاص يا ابو رضا هانت يا اسطى

ابو ليلى لو سمحت

_ابو رضا ابو رضا ابو رضا

رضا رضا يا ستي بس نتجوز بحبك يا بنت الإيه