من قلب الجنٍّى اللى غاوينى
ومشقلب حالى مع وسنينى
و ده مهما يبعد ويغيب
يرجع ويقوللى وحشتينى
أنا باضحك عِند ف وش الحزن
فيموت م الحزن ويشكينى
ويعيش الفرح ف قلبى يئن
مهما يطمعنى ويغرينى
أنا باحلم لما يعيش الحلم
ويموت اليأس ويرضينى
وبرقٌص جرحى كمان للعلم
ولا عمره ف لحظة يبكينى
أنا نقطة بيضا ف قلب سواد
والصرخة ألم وصداها اتعاد
أنا صبرى طويل لسنين قدام
واللى يحاربنى يقوينى
أنا كلمة حق ف دنيا سراب
شعاع من نور والليل كداب
ولا بابكى ف يوم على واحد غاب
واللى يفارقني بيغنينى
--





































