ما تقولي ايه حكايتك

يا وليدي مالك حزين

و غايبة ضحكايتك

قاعد و شايل الطين

فاهماك انا يا ولدي

و فاهمة قلبك زين

ما يحزنك الا شديد

عارفاك انا راجل متين

اوعاك يكون زرعك دبل

اوعى تكون ارضك بارت

و لا ماتلك كام عجل

و لا تكون بيرك غارت

و لا يكونش بيتك وقع

و حطانه مالت

و لا يكونش غيطك ولع

و الزرعة ماتت

عارفاك انا زعلان مني

لجل مرضيتش اخطبلك

و تكون كمان زعلان اكمني

قلت ف جواز ما هوقفلك

عاوزني لما تقول يا جواز

اطاوعك انا و اطبطبلك

طب ما انا جوزتك من بدري

و معاك من العيال خمسة

لبنية تشبه البدري

و الطبع فيها مش خسة

شايلاك و حاباك يا فقري

هو انت مش فاهم لسة

حب البنية و راضيها

هي اللي باقيالك

و اوعاك بضرة ترازيها

و ربي عيالك

و حاجي على عرضك

و احفظ كمان ارضك

دي العزوة اللي دايمالك