سمعتيلهم لما قالوا
فقران عدمان
معهوش م الفلوس جنيه
عمرك وياه ما تلقي امان
بتحبي ف جنابه ايه
سيبيه يا خايبة
و خدي ابو جيب عمران
يهنيكي و يسعدك
و تبقي مرات البيه
هيجبلك م الدهب كيلو
بس انت ريق حلو اديلو
و ابقي كمان ابتسميله
و يدك بتسلم عليه
هو الامان كان ف الفلوس
و لا الامان ف حبي ليكي
دة الغنا غنا النفوس
و بعمري كله انا شاريكي
الامان في قلب يحضن
قلب وحدك تسكنيه
و روحه تصبح ليكي مسكن
من غدر الدنيا تتحامي فيه
الامان ف كلمة حلوة
الامان في ايد تطبطب
الامان ف عيال و عزوة
قدام عنينا تجري و تلعب
و يسمعونا احلى غنوة
لحن ليه قلوبنا تطرب
لكن بخاطرك
كتر الفلوس خلاكي تتعمي
انا برضو عاذرك
و بكرة اكيد راح تفهمي
بس ساعتها حبيبتي
خايفك تندمي
انا همشي و اخد قلبي معايا
يمكن الاقي يوم الحنان
و الاقي روح فيها منايا
روح همها بس الانسان
و الاقي قلب على هوايا
الاقي فيه بر الامان
2
-2
