درج الذكريات ♥️

كتاب ف الدرج كان منسي ????

ف وسط حاجات

و ساعة و سبحة و مراية .. 

ظروف. جوابات

ورق كراريس بقى اصفر 

و له ريحة

بعرق الماضي متعطر 

عليه أية و تسبيحة

و كام مفتاح و كام دبلة

و بوصلة تقولك القبلة

حاجااااات يامااااا

و كل حاجة جوة القلب بعلامة

ف وسط الزحمة دي بصيت

لقيت صورة

للحظة لقيتني اتهزيت

ضحكت بنبرة مكسورة

رجعت ليوم ما كنا كتير

و كنا عشمانين ف حياة

تجمعنا بحب و خير

لا تؤلمنا و لا نقول اه

و قفنا كل كتف ف كتف

بنضحك للحياة بطموح 

قصاد الكاميرا واقفين صف

و شابكين الايدين و الروح 

و فين رحتوا يا احبابي

و ليه وحدي تركتوني

لا حد يدق على بابي

و باهتة الدنيا ف عيوني

و لكن رغم مر الشوق

و مر الوحدة و الازمة

مجرد ذكرى ف الصندوق

كفيلة ترجع البسمة