دكانة .. على ناصية حارة

مليانة .. متقولش مغارة 

و صاحبها .. طيب و امارة 

يديك و حسابك بعدين

لو عاوز .. شايك او سكر

او جايز .. كبريت م الاحمر

مهما تعوز.. جوا تلاقي اكتر

لو ف الشتا راح تلقى التين

لو عندك بوصة .. يلبسها

و عروسة .. تجهز لعريسها

 و حيطانها .. بالشبر تقيسها

تلقاها متر ف مترين

ف الدكان .. خيطك و الإبرة 

لا و كمان .. فولك و القدرة

عيش طازة .. أو جرنان بكرة

و الله براوة يا عم حسين

كل صباح .. يكنسه و يرشه

و تشوفه .. يضحلك وشه

و ميزانه .. مظبوط ما يغشه

و بكرمه .. بيصبر ع الدين