وهم ظروف الحياة

مش بنعرف قيمة بعض غير لما بنموت .. لما الزمان يسرقنا من بعض .. بنعيط ونحزن على الفراق على شخص كان حوالينا وإحنا أصلا كنا مفارقينه .. كنا دايما مطمنين أنه هنا حوالينا .. حانبعد شويتين والدنيا تاخدنا حبتين .. كلنا ناسيين أننا ممكن فى غمضة عين نصحى من النوم ما نلاقيش بعضينا .. نصحى فى يوم ما نلاقيش غير ذكرى وإسم محفور فى قلوبنا .. ونقول يا ريت ما كنا أتلهينا فى الدنيا اللى بتنسينا ناس كتير غالية علينا .. ونصحى ندور حوالينا ما نلاقيهومش .. نبقى مش عارفين ده حقيقة ولا خيال .. الصدمة بتأثر علينا ونبقى مش مصدقين اللى بيحصل حوالينا .....

بس بعد ما نفوق حانكتشف أحنا قد أيه كان مضحوك علينا بوهم أسمه ظروف الحياة ومشاغل الحياة .. ما عرفناش حتى نستمتع بأقرب الناس لينا .. وهم إحنا خلقناه وصدقناه ومشينا وراه وعيشناه .. لحد ما بقينا زى الألة ماشيين بريموت كونترول .. موتنا مشاعرنا .. موتنا حياتنا وسعادتنا .. بوهم أسمه ظروف الحياة .. نسينا أن ربنا ما خلقناش علشان نعيش لوحدنا .. ما خلقناش علشان نعيش زى الألة المتبرمجة على برنامج محدد .. ربنا ما خلقناش ألات متحجرة المشاعر ..

الحياة عمرها ما تبقى حياة من غير ود وحب و تواصل الحياة بتكون حياة لما نفتكر بعض ونخاف على بعض ونساعد بعض ..

مش نستنى لما نموت ونعيط على بعض ..

الموت صدقونى مش محتاج عياط عليه .. الموت فيه راحة وسلام وسكينة وإنتقال لعالم الحقيقة عالم الحب اللامشروط ..