لا نخاف علي بعضنا

أنا مش قادرة أفهم إيه كمية إعلانات الوظائف اللى كلها نصب على الناس أو إستغلال أو طرق غير مشروعة .. إيه كمية الناس اللى بتستغل إحتياج الشباب للشغل أو السفر .. إيه كمية الناس اللى ما عندهاش ضمير ولا مبدأ .. غير المشاريع اللى بتظهر جديدة للأستثمار والأغلبية العظمى فيها نصب وسرقة .. 

ليه ما بقيناش بنخاف على بعض ولا بنراعى يعض 

ليه بنستغل بعض ونستغل ظروف الشباب اللى الدنيا أصلا جابت أخره وأحبطته ..

ليه الشباب اللى عايزة تعيش بسلام وعايزة شغل بالحلال بتلاقى محاربة وضغوط واستغلال..

إزاى أختفت الرحمة من قلوبنا ومن حياتنا ..

إزاى الجشع تغلغل فينا كده .. 

ليه شوهنا صورة الحب والخير والحلال ..

ليه بنضغط على الناس لحد ما تخرج عن عاداتها وتقاليدها..

ليه نفضل نحارب فيهم لحد ما يطلعوا أسوأ ما فيهم ..

"بيفكرونى بفيلم جعلونى مجرما"

الضغط والإضطهاد والقسوة والإحتياج بتحول ناس كتير من ناس مسالمة وعايزة تعيش بسلام .. لناس مليانة حقد وغل وكره .. لناس ممكن تتنازل عن أى شيئ علشان بس تعرف تعيش ..

أرحموا بعض .. حسوا ببعض شوية .. حبوا بعض أكتر 

أنشروا الحب والسلام والرحمة فى الأرض ...