ناسا تكتشف كوكب جديد

 المضحك المبكي 

          ناسا تكتشف كوكب جديد 

         (ماشى .. بس خليك معايا دقيقتين)

🔴 من وقت لٱخر تخرج الأخبار على كوكبنا بخبر :

         "إكتشاف كوكب جديد شكل الأرض تماما"

🔴 بفرحه .. يتبادل بعض الأخوه (وخاصة الهبيده) على الفيسبووك للخبر وهم قاعدين على الكنبه (بالفانله واللباس من شدة الحر وحاضنين المروحه الصيني) ، وقبل ما الكهرباء تقطع فى بيوتهم ، وبيقزقزوا لب بعد ما جددوا باقة التليفون (إللي فودافون بتسرق رصيدههم) وينقلوا عنوان الخبر بس !!

🔴 ولم يهتموا بباقى الخبر وتفاصيله. وكالعاده قص ولزق مع كل وأى خبر كما تفعل "اليوم السابع" إللي بتكذب كل يوم فى الأسبوع !

🔻 يعني مثلا خبر أكتشاف وكالة الفضاء الأمريكيه (NASA) لكوكب جديد أسموه "كيبلر - Kepler-62e" متسمي على إسم التلسكوب إللى إكتشفه، 

🔻 وطبعاً قالوا أنه يدور حول نجمه (زى الشمس بتاعتنا) .. رووعه !! 

🔻 ودورته السنويه 380 يوم (تقريباً زى الأرض بتاعتنا) .. جميل جداً !! . 

🔻 ومن الفرحه بيقولوا هايبقى بديل للأرض وممكن نروح هناك ونعيش ونشتغل (تقريبا بدون تأشيره وبدون "طويل العمر" الكفيل) .. جميل أوى أوى !!

🔻 بس المعلومه العلميه (لمن يدقق ويتمعن) لا تتماشى مع السطحيه والهيصه (العلم قلبه قاسى أوى ولا يعرف العاطفه) ..

🟥 وبناء عليه فيه معلومات وراء هذا الإكتشاف تخليك تقول : "يافرحه ما تمت" :

1️⃣- الكوكب الجديد خارج مجموعتنا الشمسيه فى مجموعه تانيه إسمها "ليرا" (Lyra) تبعد عنا 1,200 سنه ضوئيه ..

2️⃣- يعنى لو ركبنا أنا وإنتا سفينة فضاء ميكروباص من موقف "كعابيش" على شارع فيصل (وحضرتك تلم الأجره) والسواق ما يشغلش أغاني سعد الصغير أو حموبيكه ، ودفع "كارتة" الطريق السريع ويسير بسرعة الضوء "النسبيه" (حوالى 300.000 كيلومتر فى الثانيه) وطبعاً ده مش ممكن .. 

3️⃣- ولو ممكن ، والسواق موقفش ينفخ الكاوتشات فى ورشة الأسطي "زاروس الميكانيكي أبو راسين" إللي على يمينك وإنتا نازل من الدائري بتاع كوكب "عطارد" ،

4️⃣- ولو مفولش بنزين فى البنزينة اللي فى ٱخر الطريق السريع بتاع كوكب "زحل" .. و .. ولو ما نزلناش كلنا لإستخدام "المبوله" ،

5️⃣- ولو عدينا بسرعه بدون ما السواق يتخانق مع امين شرطة كمين الشرطه اللى فى مدخل طريق الكوبري الجديد بتاع كوكب "المريخ" ، 

6️⃣- هانوصل ، بعون الله (للموقف الجديد) للكوكب الجديد ده بعد 1,200 سنه !! .. وعلى فكره دا مش رايح جاى .. دا رايح بس .. !!!

🔵 بقولك أييه يا حبيبى إنتا وهوا ، خلينا فى كوكب الأرض أحسن .. وياريت يوسعوا "طريق قريتنا كفر الحصه" المؤدي "لكوكب قرية طنيخ" !!

🔵 وكمان لأنى بحب محل عصير القصب إللي فى موقف "كعابيش" ! برغم النحل ، وبرغم ان سواق "توك توك" داس على رجلى هناك وبوظ جزمتي ..

😂(منه لله البعيد)❤️⁩😂