ناقصك إيه؟!
ـ إنت ليه دايما حزينة، إنت إنسانة ناجحة، جميلة، ذكية ومحبوبة من الجميع
إيه إللي ناقصك؟
ـ الحمد لله ولا شيء ناقصني، أنا إللي أتعودت عالحزن! .. وزي ما أنت شايف كل النعم دي وبرضوا جاحدة ومش بأحمد ربنا؟! مش ده تفكيرك؟!
-لا مش دا قصدي خالص..
- أنا مش زعلانه من كلامك .بس الكلام دا بأشوفه قبل ما أسمعه في عيون وتلميحات ناس كتير هم شايفين إني في نعم كتير وجاحدة بحزني وأن دا عدم رضا! بس مش عارفين إن ناقصني ألف حاجة!
ناقصني أب، أتحمى فيه من غدر الزمن، أترمي في حضنه، أحس بالأمان وأتسند عليه😔حتي لو هو إللي كبر وبأسنده، وجود الأب أمان حتى لو عندي أربعين سنة!
ناقصني أم😔 آه أم .. وحشتني كلمة (ماما) قوى وحشني حضنها، حبها، حنانها، اهتمامها وخوفها عليا. ياااه الحياة من غيرها ولا شيء😔 أنا من يوم ما ماتت عايشة ومش عايشة دموعي دايما في عيوني و لا فرح ولا نجاح له أي معني من غير وجودها ومشاركتها وفرحتها بيا. ناقصني دنيا بحالها من غيرها أنا مش عايشة لكن بأمثل أني عايشة !!
ناقصني أخ يكون سندي لو وقعت، ظهري لو حد حاول يغدر بيا. أخ يتصل بيا كل يوم يسألني أنا فين؟! .. يطمن عليا، يفتقدني لو غبت، أوحشه لو سافرت يتصل يقول وحشتني وخلي بالك من نفسك!فينك ؟! .
ناقصني أخت😔 تسمعني باهتمام .. يكون هميّ همها و فرحي فرحها، حزني وتعبي يتعبها وألاقيها جنبي في أي وقت، وفى أي مناسبة، فرح أو حزن، لو غبت ساعة تتصل بقلق
وتسألني فينك؟ وحشني كربك يا بت! نضحك ونبكي في حضن بعض نكون أخوات بجد!
ناقصنى خالة و خال وعم يكونو زي ما سمعنا في أمثال زمان الخالة والدة والخال والد مش مجرد قرابة على ورق!
ناقصني زوج بجد يكون حبيب و أخ وأب وصديق ليا، مش زوج بس له حقوق
دستورية وواجب هو كل علاقته بيا؟! زوج يكون سندي، يسمعني و يفهمني
يحتويني، أحس معاه بالأمان والرضا والحب والسكينة زوج يتصل كل ثانية بيا يطمن أنا فين، لو أتاخرت دقيقة يقلق ويدور عليا، أكون أهم حاجة في حياته، لا أكون حياته كلها.
زوج يكفيني عاطفيا مايحوجنيش لحد أشحت منه الحنية والاهتمام والحب!.. زوج يكون
كل أهلي، احكي له أي حاجة وفي أي وقت بدون أي خجل أو خوف منه إنه يعيرني!؟
زوج أعري روحي قدامه ويطبطب عليها ! يضمني لما أبكي ويسمعني بشغف.
حتي لو هأصحيه من عز نومه عشان مضايقة!.. يقعد يسمعني وهو واخدني في حضنه!. يرقيني ويهديني لحد ما أنام في حضنه زى طفلة صغيرة!.. يفاجئني بعشاء رومانسي علي ضوء الشموع !.. أصحا ألاقي وردة وورقة جنبي مكتوبة فيها " بأحبك " ما رضتش
أصحيكى عشان كنت تعبانة. صباح الخير يا حبيتي.. يا عمري يا روحي!!.. وقتها أنسى كل ألم وحزن وأبتسم بكل رضا وحب وأقوم كلي نشاط أغسل .. أطبخ .. أروق ..
أنتظره بكل شوق ولهفة كأني ما شوفتوش من سنة ! أكون ملهوفة عليه ويوحشني قوى مش أكره لحظة رجوعه لصمته وعصبيته وعدم فهمه ليا!
عرفت دلوقت ناقصني إيه؟! ناقصني عيلة، أسرة، دفء وحضن وأمان وحب واهتمام.
باختصار ناقصني حياة كاملة!!
2
-2
