سحر السنين
ورجعت لك
ف القلب شايلة محبتك
وليالي أنس ف صحبتك
وسنين جرفها الموج
وسنين عطشها القلب
يصبر ...ويحن لك
أنا م اللي
غذاهم نخيلك
دفاهم أصيلك
واستباحوا الأرض
واتغطوا بليلك
أنا م اللي
قاموا وناموا
دفيانين ف حضنك
إنت الحبيبة
تعقدي المنديل على راسك
نبوسك
م الجبين ..وندوب
نشم المسك والعنبر
ونتخدر
ورعش قلوبنا يتحول ...حنين
ياااه على سحر السنين
والنقشبندي بصوت كمنجي *
يبل ريق الصائمين
ياااه على سحر السنين
وأنا باتملي م الفرحة
بفانوسي الملون
وبثبات
أدب الخطوة مع البنات
تتهز ضفايرنا ..تسابقنا الأمنيات
ونقول : آمين
ياااه على سحر السنين
وعم سيد ..بصوت حنيين *
ينده علينا ..اصحى يانايم
قوم ..وحد الدايم
وحد الرزاق
دا الكون سباق
من غير ذواق
اصحى وحد ..ولاتنسى تسجد
على أرض طاهرة ..لملمت شهداء
والأرض بتتكلم عربي )*
تقول الله )*
مع كل صلاة
تتهز مدنة ..على طول بلادنا
م القاهرة لدار البيضاء
والنيل ..فراتي
مجروح يوماتي
تئن مدنة على نهر دجلة
والجرح يعلا
تتهز له كل المدنات
وآه تقولها
تتحول الآهة لآهات
اصحى يانايم
اصحى ووحد ..وسيد وجدد
في الأرض اضرب بجدرك وشيد
دا الأرض طاهرة وصابرة
بالجهد قادرة
تحول الطينة لجنات
اصحى يانايم ..وحد الرزاق
----
الموسيقار سيد مكاوي
شطر من شعر فؤاد حداد غناه سيد مكاوي
*الشيخ سيد النقشبندي .مؤدي التواشيح الدينية الشهير
2
-2
