لو كانوا شافوا

إلى الطفل الجميل البراء واخوته في إحدى دور الأيتام

---

لو كانوا شافوا -يابني-

نظرتك

وانت بتطبطب على الوجع

اللي ساكن جوه نني العين

وتمد للدنيا -على استحيا-

إيدين مضمومين

خايف تمد إيديك أكتر

ليتبعتر

كل اللي شايله جوه قلبك

من يوم ميلادك

حبة وجع وأنين

لو كانوا شافوا

قد إيه حلوة البراءة

لما تلمع ف العينين

وتنط تتمنى

 لو تحضن الدنيا

تبقى لها ..

حضن وسكن وحنين

لو كانوا شافوا ضحكتك

شكوتك

من دنيا فوق كف الوجود

حطتك

تحبي على وجعك

تدوس قساوة وحدتك

ولا يوم هاتعرف منبتك

إمتى وفين

لو كانوا شافوا

لهفتك

لحضن يطفي دمعتك

وماينتهيش

تخطف لقلبك حبة دفا

عارف بإنه ف يوم

 هاييجي

ويوم مفيش

مش ذنب قلبك

هما اللي شافوا

حلم دافي بيتولد

لفوه في خوفه ووحدته

وسابوه لأنياب الحياة

وحده ..يعيش

لو كانوا شافوا