سعيدة بنهاية الحكاية

هل ممكن الانسان يتمنى حاجة بالحاح شديد وتحصل فعلا!؟

برغم ان انت مبذلتش اى مجهود عشان توصل للحاجة دي

غير الدعاء الكتير والتمنى الشديد

كأنك بتتمنى اخر حاجة هتربطك بالعالم دا 

ومن غيرها هتحس انك انتهيت 

او هتكون بالفعل انتهيت

الحقيقة اني مش عارفة اجاوب ع السؤال دا 

بس هحكي حكاية لصديقة ليا 

هي اللي خلتني اطرح التساؤلات دي 

صحبتي بتحب واحد من عشر سنين وزيادة

بس حب من طرف واحد 

حب مرهق جدا ومتعب اوي 

حب خلاها ترهن حياتها كلها ليه 

اتجوزت وانفصلت ولما حبت الانسان دا 

رفضت ترتبط باى مخلوق 

طب يابنتي اظهريله نفسك 

ترفض

كلميه ترفض بردوه

اعملي اى حاجة تخليه يحس انك عايشة على وش الارض 

بردوه مفيش!!!

كانت متيمة بيه وشايفة نفسها دايما اقل منه بكتير ف كل شئ

والانسان دا كان دايما متحاوط بعلية القوم زي ما بيقولوا 

وستات من اللي بنشوفهم ف التليفزيون ومنحلمش نبقى زيهم 

الحقيقة جالها فرص كتير اوي 

وفرص ممتازة للاستقرار ولتكوين حياة اسرية كويسة جدا

لكنها كانت دايما مشعلقة عينها وقلبها بيه 

ومش شايفة غيره 

عدى العمر وهو لا شايفها ولا حاسس بيها طبعا ولا عارف انها موجودة على كوكب الارض اساسا

لحد من فترة بسيطة اقترحت عليها مجرد اقتراح 

انها تتابعه ع الفيس بوك 

تعلق تعليقات بسيطة واهي حتى تبقى قريبة منه باي وسيلة خاصة انه شخصية عامة ومعروفة نوعا ما على السوشيال ميديا 

بعد معاناة وافقت حطت صورة جميلة ليها دخلت علقت عنده تعليقات عادية جدا 

لكن للغريب انه مكنش بيعبر تعليقها ابدا 

بل هي الوحيدة اللي حتى ميعملش لايك عليه

كان شئ غريب شوية 

جاتلى منهارة وورتني ودموعها سخنة على وشها 

انا منظرها الحقيقة وترني وكان نفسي اهديها ومش لاقية كلام مناسب 

فبصراحة مسكتها وغسلتها وقولتلها فوقي بقى حياتك بتضيع ف اوهام ملهاش اساس

بصتلي بمنتهى القهرة والحزن والكسرة وسابتني ومشيت 

فضلت طول الليل الوم نفسي وخايفة عليها 

لحد مالاقتها بتخبط عليا الساعة ٦ الصبح وانا مخضوضة ومرعوبة بصتلها لقيت اعظم ابتسامة ممكن الانسان يشوفها 

ابتسامة منورة كلها نصر وفرح 

ولهفة جريت عليا ومفهمتش كتير من كتر عياطها وسرعتها 

جمعت بس انه بعد ماهي سابتنى وف عز حزنها وبؤسها

هو غير صورة بروفايلة 

وهي بتلقائية بعتتله اغنية تسعيناتي جميلة كتعليق ع الصورة وخلاص

فوجئت بعدها بدقايق ان في رسالة جاية منه وطلب صداقة كمان 

باعتلها اغنية وبيقولها دي احلى

وابتدى بينهم كلام وحوار كان متأجل من عشر سنين ❤

استغرب انه مشفهاش قبل كده رغم انها جنبه طول الوقت 

ولا يعرفهاش قبل كده رغم انها حافظه تفاصيله صم ????

الاغرب انه اعجب بيها 

واتطور الموضوع وحبها في فترة قياسية اتخطبوا 

وانا في منتهى الاندهاش 

والحيرة؟!!!!

ولا لقتش اى اجابة لاسئلتي 

حكاية زي الافلام من المستحيل انها تتحقق على ارض الواقع 

خاصة اننا مش ف زمن معجزات ولا انبيا????

معنديش تفسير لحكايتهم اللي انا كنت شاهد عليها من اول يوم 

ولا عارفة هي كانت صح او غلط 

ولا لقية اجابات منطقية 

لكنى مبسوطة اوي اوي بالنهاية السعيدة لحكاية زي الاساطير❤????