القصة دي حصلت من 30 سنة بالظبط وانا كنت شاهدة عليها

كان عندي وقتها 12 سنة

كان في اتنين اتجوزوا بعد قصة حب كبيرة وجميلة بس اهله مكنوش موافقين خصوصا امه حاربت كتير اوي عشان يتجوز قريبته وهو رفض واصر، يتجوز حبيبته وفعلا اتجوزها وخلف منها ولد زي القمر لكن المشاكل كانت بتزيد وامه مقومة حرب عليهم 

الست دي كانت تيجي لاخوتها جيرانا ولامي عشان امي رحمة الله عليها صاحبتهم وتحكيلها وتعيط من كتر الخناقات والمشاكل وكله كان بيهون عليها انه طالما جوزها كويس معاها وهما مش ف بيت واحد فخلاص تعيش وتسكت 

وبالفعل الحياة مشيت عادي وكانوا بيحاولوا يخلفوا تاني لانها من كتر الضغط والمشاكل حملت مرتين وسقطت المهم ف يوم عادي جدا قضت الليلة ف حضن جوزها وكان مصر، انها طول الليل تفضل ف حضنه دا ع غير العادي وصحى الصبح بكل نشاط وحيوية وابنهم بيتنطط وسطهم ونزل جابلهم فطار وقالها نفسي اكل ملوخية ولحمة 

وفعلا جابلها الملوخية واللحمة وفطروا سوا وطبطب عليها وخد ابنه ف حضنه ووعده انه هيوديه الملاهي بكرة وسابهم ونزل يفتح محله 

والست كانت في منتهى السعادة قامت روقت شقتها وجهزت الغدى 

وهي فاكرة كويس اوي عملت ملوخية ولحمة محمرة وسلطة ورز الاكلة اللي جوزها حبيبها نفسه فيها

عملت الاكل بمنتهى الحب وبعدين استحمت هي وابنها وسرحت للولد شعره وشغلتله التليفزيون وقعدوا يستنوا بابا يرجع عشان ياكلوا سوا💔

فجأة الباب خبط بعنف ودي مش خبطة جوزها الست قلبها وجعها وقامت تجري وتسال مين؟ 

رد الصوت من ورا الباب افتحي انا اخوكي 

الست اتخضت وفتحت لقت كل اخوتها قدامها الرجالة والستات اتسرعت وقالتلهم امي جرالها حاجة؟ 

اخوها بصلها ف عنيها وقالها امك بخير وزي الفل ومستنياكي 

البسي هدومك جوزك طلقك وهتروحي معانا💔

هي استيعابها وعقلها مقدروش يستوعبوا الكلمة اصلا

فسالته تاني وهي بتعيط امي مالهاااا

قالها بقولك امك كويسة جوزك طلقك ويلا عشان هنلم عفشك!!! 

هي مازلت رافضة تستوعب وجاتلها نوبة صويت هيستري وفضلت تضرب فيهم وتطردهم اطلعوا برة بيتي 

اطلعوا برة بيتي للاسف مكنش قدام اخوها غير انه ضربها بالقلم ومسك دراعها وبص ف عينها وقالها

جوزك جالنا وقالي انه مش هيقدر يكمل معاكي ولا قادر على الحرب مع امه 

وطلقك وهناخد كل حاجاتك

الست سكتت 

سكتت تماااما ومنطقتش ولا بكت اختها لبستها جلبية بيت وابنها بيعيط ماسك فيها شالته ومشيت مع اخ ليها للبيت بدون ولا كلمة 

تاني يوم امي خدتنا انا واخواتي ونبهت علينا نلعب مع احمد ابنها ومنضايقوش

فعلا خدنا لعبنا وروحنا معاها 

بس انا مقدرتش العب معاهم انا مقدرتش اشيل عيني من عليها كانت قاعدة وكل اخواتها البنات وامي وبعض الجيران حواليها بيحاولوا يطيبوا خاطرها باي كلام 

بس هي مش بتنطق ولا حتى بتبكي هي بصة للفراغ وساكته وبعدين قامت خدت ابنها من وسطنا ودخلت اوضتها وسابت الكل برة مفحوم من العياط عليها

عدت الايام والست دي نزلت اشتغلت مدرسة ف حضانة وابنها بدء يكبر، وسطنا ودخل المدرسة وشافها صاحب اخوها وحبها وعرف ظروفها واصر يتجوزها 

فاخواتها كان شرطهم انها تسكن وسطهم ف نفس البيت ووافق الراجل واداهم مهر محترم 

وربنا عوضها واتجوزت وصراحة الراجل شالها هي وابنها جوة عنيه عمره مازعلها ولا جرحها وربى ابنها احسن مايكون ومحرموش لا من حنان ولا حب ولا فلوس 

~ف الاثناء دي طليقها رفض انه يتجوز قريبته رفض تام وقال لامه انتي غصبتيني اهد بيتي فانا هعاقب نفسي بالوحدة للابد ومش هريحك 

وفعلا ماتت امه بعد جواز الست دي بكام سنة وهو كمان بعد عشر سنين من الاحداث دي مات وحيد ف شقته محدش حس بيه 💔

الخبر لما وصلها لا هي ولا ابنها اتأثروا دا اللي كان ظاهر لينا

وعدى العمر وكبر الولد واتخرج من الجامعة واتجوز وخلف ولد وبنت ومراته هتولد الطفل التالت اهو 

والست كبرت والمفروض نسيت وعاشت حياة حلوة مع راجل محترم جدا عوضها عن كل وجع

ومن كام يوم كلمتني اروحلها عشان عايزاني اصبغلها شعرها عشان تحضر ولادة مراة ابنها وهتقعد معاها 

وكنا بنهزر انا وهي وبتقولى عايزة ابقى حلوة يابت ياسالي وفضلنا نضحك وجت سيرة اتنين جيرانا احنا عارفينهم كانوا بيحبوا بعض من صغرهم واتجوزوا وللاسف لسة مطلقين ومعاهم طفلين كنا بنتكلم عنهم واحنا زعلانين ومستغربين 

وفجأة وانا بعملها شعرها وبتكلم معاها لقيتها مسكت ايدي وشدتني جامد وقربتني منها وبصت ف عنيا وعنيها كلها انكسار وهزيمة ودموع محجرة 

وبعدين بصوت متحشرج سألتني

هو ليه ياسالي عمل فيا كده؟؟! 

وحسيت برعشة ايدها على ايدي معرفتش انطق انا طبعا فهمت قصدها وأتلجلجت 

ومحستش غير ودموعي بتغلى ونازلة على وشي وبقولها هو انتي منسيتيش ياطنط؟ 

لقيتها هزت راسها ف ضعف وحزن شديد وقالتلى

~انا مش قادرة انسى ولا اتخطى ولا استوعب الغدر!!!! 

انا كل اللي واجعني وتاعبني الغدر انه غدر بيا وانا ف عز فرحتي وهنايا معاه 

كان نفسي يقولي انه هيعمل كده كنت هفهم وهسامحه والله 

بس مكنتش هفضل طول عمري بالوجع دا ولا بسأل نفسي كل يوم ليه

ليه حد ممكن يوجع حد للدرجة دي وهو مشافش، منه غير كل خير وحب وحنية 

انا بس كان نفسي اشوفه لمرة واحدة بس واسأله ويرد عليا ويبرد ناري 

عارفة يسالي انا مستعجلة اوي ع الموت عشان اقول لربنا هاته قدامي وهاتلي حقي وحق ابني واترمت ف حضني وسيبتها تعيط لحد ماحسيت انا وهي خلصنا دموع 30سنة وجع!!!! 

وانا رايحة الشغل كنت حزينة جدا وقلبي واجعني عليها وعليا لاني مريت باحساس الغدر البشع دا وفضلت اسال نفسي زيها ليه

ليه الانسان ممكن يوصل بشره وحقارته انه يوجع انسان حبه من كل قلبه الوجع دا ليه

🌱بس اكتشفت ان الستات مش بتنسى 

الستات بتركن وجعها وتكمل حياتها عادي تشوفها تقول اسعد ست 

رغم ان جواها حزن يهد جبال

وانا ماشية بسأل نفسي وزعلانة ومهمومة

لقيت عبد الحليم حافظ بيقولى 

*وف عز الامان ضاع مني الامان واتاريني 

ماسك الهوى بأيديا💔*

بصيت على مصدر، الصوت من قهوة بلدي عتيقة ابتسمت وانا دموعي على وشي وقلتله عندك حق ياحليم💔

وكملت طريقي💔💔💔💔