ابني النهاردة راجع من المدرسة على غير العادة 

اول مافتحتله الباب فضل يبوس، ويحضن فيا والفرحة اللي على وشه مشفتهاش قبل كده بجد 

قلتله مالك ياحبيبي خير

الواد واقف مش على بعضه بيتنطط حرفيا 

وحكالي انه وهو خارج من المدرسة مع اصحابه وقفته بنوته وقالي لابسة لبس ثانوي زيهم وقالتله معلش ممكن اقولك حاجة!! 

قالي يماما ارتبكت جدا وقلتلها اتفضلي

قالتله انا بقالي فترة طويلة عايزة اقولك 

ان لبس المدرسة لايق عليك اوي ومخلى شكلك زي القمر انا بشوفك كل يوم وانت خارج من المدرسة والكاب الكحلى بتاعك منور وشك مع النضارة

ابني كان بيقولى الكلام اللي، هي قالته وهو الفرحة والسعادة منورة كل حتة ف وشه حرفيا

قلتله طيب وانت قلتلها ايه يانور؟! 

طبعا لان ابني مصري أصيل وكلنا مبنعرفش نرد عدل ف المواقف المهمة

قالي قلتلها شكرا ومعرفتش انطق بعدها 

وهي عملتلى باي ومشيت 

وقالي صحابي فضلوا يزفوني طول الطريق

اخدته ف حضني وطبطبت عليه وقلتله انت قمر فعلا ياحبيبي وهي بنوتة جميلة وذوق كتر خيرها 

الموقف افتكرته خلص وانتهى 

بس لاقيت الواد ماشي ف الشقة عنيه بتطلع قلوب 

روق سريره وعمال يغني ومشي يبوس ف القطط ويسقي الزرع

وكل شوية يقولى محتاجة حاجة اساعدك يماما

وانا متعودة اغسله تيشرت المدرسة كل يوم لما يرجع 

عمال يقولى يلا يماما انشريه عشان لما ينشف احط برفان فيه من باليل

وقد ايه الانسان غلبان راجل او ست 

الكلمة بتفرق جدا جدا معاه 

والكلمة قادرة ترفع الانسان سابع سما او تخسف بيه الارض

انا حاليا بجهز الغدى قبل مانزل الشغل بتاعي وعمالة اتفرج على ابني، وهو الابتسامة مش مفارقاه

وعمال يعمل الواجب ويكلم صحابه

ويهزر مع أخته ويضحك ونفسيته مرتفعة وانا حقيقي فرحانة جدا جدااااا 

وربنا يبارك في كل انسان بيقول لغيره كلمة طيبة تفرحه وترفع معنوياته