فى حاجات لو فضلت مكانها مكناش هنعرف قيمتها ، وحاجات لو إتكسرت جوانا هنبقي أقوى بكتييير ، وحاجات لو مش مرينا بيها مكنش هيبقي مكانتنا زى دلوقت .

يعنى إزاى الكلام دة

**وأنا بفرش شقتى قبل جوازى بيوم واحد إتكسرت إزازة برفان في أوضة النوم وأنا بوضبها عالتسريحة ، بصراحة زعلت عليها جدُا لأنى كنت معتقاها كام سنة .

المهم لميت الإزاز المتكسر وتركت البرفان عالأرض تشبعت بيه   

لكن بعد كدة طول الوقت ولمدة شهر كامل ريحة البرفان معبقة الأوضة وبالعكس الشقة كلها مليانة ريحتها ، وكل الضيوف ال بتيجى منبهرين بالريحة الجميلة دي ...😊

تصوروا الريحة الجميلة دي كانت مخنوقة في الإزازة الصغيرة دي،  

وقتها مكنتش فاهمة أهمية الريحة المنتشرة في البيت وكان كل همي هو حزني عليها لما إتكسرت ..

ومع مرور السنين فهمت إنها كان لازم تتكسر عشان تطلع أجمل مافيها عشان ريحتها الجميلة تزكم الأنوف ..

**عايزة أقول من الحكاية دي أن ممكن يكون قلبك مكسور أو حاجة جواك إتكسرت .. 

_لكن تأكد بأنه إنكسر عشان يخرج شيء جميل مستخبي في قلبك .. 

_عشان يخرج خبرة جديدة في حياتك .. 💪

فيكبر عقلك وتتغير طريقة تفكيرك .. 

_إياك تحزن لما تتكسر ، إياك تحبس نفسك في وهّم الإكتئاب ، إياك تندم على سنين عمرك اللي ضاعت في المكان الغلط مع الناس اللي متستاهلكش .. 

إبدأ من جديد بخبرة أكبر وبقلب أنضف، وبعقل يقدر يوازن كل الأمور

ربنا عايزك تكون أفضل عشان شايلك حاجات كتير ،وأكيد هتلاقي المكان الصح والناس الصح اللي تقدرك ..

 بس إرمي حمولك عليه..