جوة كل واحد فينا حبة حاجات على بعضهم ، ذكريات مبتتحكيش لحد ، أحلام حلوة ، شغف وطاقة، تصميم وارادة.. وحبك انك تكون احسن كل يوم ، بس مش كل الناس ممكن تطلع احسن حاجة فيك .
يوم ما هتلاقي اللي قدامك بيقولك اسراره وبيشاركك تفاصيل حياته وبيبقي مبسوط في وجودك وبيرتاحلك ، ارجوك متخذلوش
عارف لو قولت الكلام دة فعلًا من قلبك ؟ هيتفهم صح وهيوصل وهيتقدر وهيتحب وهيبقي كأن عليه ختم بتاعك انت لوحدك مميز وملوش زى.
انما لو تصنعت مشاعرك ومحسستش الشخص اللي بتكلمه انه أهم حد في حياتك وقت الكلام معتقدش مهما كتبت كلام انه هيتحس .
زى ماتحب تتعامل عامل الناس ، هتفرق كتير على فكرة واعرف أن كل الناس بتحب انها تتحب بس كل واحد ليه لغة مختلفة بتفرق معاه اكتر من غيرها.
فى ناس بتحب تسمع كلام حلو ، وناس بتحب الهدايا وناس بتحب تتعزم عزومة حلوة وناس لغة حبها الطبطبة و الحضن الحنين ، ناس لغة حبهم معنوية اكتر منها مادية زى المدح مثلا ..
بإختصار لو عرفت لغة حب اللى قدامك قلبه ومفتاحه هيكونوا ملك ايديك، وعيزاك تعرف انها نوايا وكل مانيتك صفيت كل ماهتلاقيها بتتفتح في وشك من حيث لاتدرى، وانسي خالص فكرة ان المجتمع بقى فيه ناس وحشة عشان كدة انت لازم تبقي وحش وتعامل الناس بالمثل ! دا كدة غلط ، خليك بنقائك المعهود دايمًا عشان كل حد جواه عملة نادرة لو دورنا عليها في كل حتة مش هنلاقيها الا عنده هو وبس فحافظ على كنزك واياك تنطفىء ، جايز تكون انت نقطة النور الوحيدة في قلب أحدهم..
2
-2
