الحب سهل؛ أى حد يحسه وأى حد ممكن يحسسك بيه ويقولك كلمة بحبك، بس الأكيد مش من السهل حد يحس بيك ويهتم بيك ويخاف عليك ويكون دايمًا مصدر تشجيع ليك.

حد بتحسه مرايتك ، حد ينور حياتك ، 

حد بتشوف نفسك بعيونه ، وتشوف بروحك دقات قلبه ،

حد بيهتم بأدق التفاصيل المهمة بالنسبالك ،حد عارفك من جواك ودايمًا شايفك بعقله وبقلبه أحسن من أى حد ، حد بيفضل جنبك في كل تقلباتك المزاجية ، حد معاك في الحزن قبل الفرح ، مش بيسيبك لحد متبقي كويس وبعدين بكل برود يرجع يكلمك ويقولك ها هديت!

حد مستعد يعيش حياتك بكل تفاصيلها بحلوها ومٌرها ، مستعد يشوفك في أسوأ حالاتك وميسيبكش الا لما تكون في أحسن حالاتك برغم حزنك ، حد ميملش منك وميحسسكش إن كلامك ملوش لازمة ، حد يواجه معاك ظروف الدنيا ميستسلمش ومايهربش .

حد تحس إنه متمسك بيك، مهما حصل تلاقيه مجنون ،طفل معاك، وعاقل مع غيرك يترمى في حضنك وتدوب في قلبه ، طيب ،حنين ،كريم مش بخيل في مشاعره ، حد يبقي سند ليك وسبب ابتسامتك دايمًا، وانك لما تنجح في حاجة يُحتم عليك تذكره في اللي وصلتله ، حد كدة عايزك تبقي أفضل حد، بيغير عليك، بيديك مساحتك .

 بيتشارك معاك في كل حاجة وبيكون أول حد تجري عليه وتحكيله كل حاجة في نفسك وتاخد رأيه فيها .

حد بيتنظر يخلص كل مهامه ويجري عليك يكلمك ويطمن عليك، يحسسك إنه معاك ولو برسالة فيها كلمة واحدة بس ممكن تغيّر يومك.

حد كرامتك من كرامته ، حد بيخاف من إنه يجرحك ولو بكلمة ، حد بيخاف عليك أكتر من نفسه، حد بيقولك دة صح ودة غلط، ده تعمله ودة متعملوش، حد بيطمنك دايمًا أنه جنبك ومعاك ومش هيسيبك ،ويقولك متخافش أنا جنبك.

_ أنا دايمًا مقتنعة أن الأهم من الحب هو الإستمرار في الحب . 

عشان كدة متنبهروش ببداية أى علاقة .لأ إنبهروا بيها بعد سنين كتير تعدى عليها وتلاقوا أنهم لسة بيحبوا بعض زى ماكانوا في بداية العلاقة.

 وان محدش اتغير بل بالعكس حبهم لبعض زاد أكتر لأن فى حاجات كتير في حياتهم خليتهم يحبوا بعض أكتر من الأول.

الحب أسلوب حياة بس لو كان حب بجد..