في الزمن ده، بقى الطلاق زي زرار "Restart" في علاقة ماشتغلتش.

أول ما تحصل مشكلة، نسمع الجملة الشهيرة:

"مش قادر أتحمّل... نطلق ونرتاح"

كأننا بنتكلم عن فسخ اشتراك في جيم، مش عن بيت اتبنى بحب، وسنين من العِشرة!

الطلاق عمره ما كان عيب…

ولا هنقول لكل الناس "استحملوا غصب عنكم".

بس الفرق كبير جدًا بين طلاق بييجي بعد محاولات حقيقية فشلت…

وبين طلاق بييجي عشان مفيش حد أصلاً حاول.

 هل احنا بنفهم الجواز صح؟

من كتر المسلسلات، والأفلام، والبوستات الوردية على السوشيال ميديا،

ناس كتير بقت فاكرة إن الجواز هو الونس الأبدي، والرومانسية اللي مش بتنتهي،

لكن محدش قال إن الجواز أوقات بيكون:

خلاف على المصاريف

اختلاف في الأولويات

ضغط من الشغل

أو حتى صمت طويل… محتاج كلمة طيبة تكسره

ومحدش قال إن في الجواز، الناس بتتغير، والظروف بتتبدّل،

وإن الصبر مش ضعف، ولا التنازل انكسار، بل بالعكس… هو قوة.

طيب إمتى يكون الطلاق هو الحل؟

 لما العلاقة تتحول لتعذيب نفسي أو جسدي

ولما الاحترام يختفي تمامًا

ولما التواصل يبقى مستحيل

ولما الأطفال يبدؤوا يتأذوا من وجود الطرفين مع بعض

لكن الطلاق مش المفروض يبقى الحل الأول، ولا رد الفعل التلقائي،

خصوصًا لما يكون سبب المشكلة بسيط… لكن الكبرياء كبير.

طيب هل انت جربت تفهم قبل ما تحكم؟

قبل ما تقول: "أنا تعبت ومش قادر أكمل"

جرب تقول:

"أنا محتاج أتكلم بصراحة"

"أنا عايز أسمع من غير ما أقاطع"

"أنا هحاول أغير طريقة تواصلي"

يمكن اللي بينكم لسه فيه أمل،

يمكن الموضوع كله كان محتاج جلسة واحدة مع مختص

أو حتى سهرة هادية من غير توتر ولا لوم.

 احنا بنكرّر نفس النهاية للاسف… لأننا مش بنتعلم من البداية

وفي علاقات كتير… الناس بتسيب بعض،

وتدخل علاقات تانية… وتتفاجأ إن المشاكل شبه بعض.

ليه؟

لأن المشكلة مش دايمًا في "مين"، لكن في "إزاي" بنعيش مع بعض.

طيب هو المطلوب مننا إيه كمجتمع؟

مطلوب اننا نعلم أولادنا من البداية إن الجواز مسئولية، مش بس حب

نوعّي البنات والأولاد بإن الخلاف مش نهاية، لكن فرصة للفهم

نطبع فيهم قيمة "النية الصافية"، و"الرجولة اللي تحمي مش تجرح"، و"الأنوثة اللي تتحضن مش تتحدّى"

ياريت نوقف الحكم السريع على اللي بيطلق أو اللي قرر يكمل

ونرجّع للمشورة قيمتها، ونفهم إن "الرجوع مش ضعف"، وإن "الاعتذار مش مذلة"

واخيرًا عايزة اقولكم ..

الطلاق مش لعبة، ومش موضة، ومش بطولة…

ولا عمره كان طريقة نكسر بيها بعض.

لو مقدّرتش تنقذ العلاقة، اخرج منها بكرامة

لكن قبل ما تخرج… جرب مرة أخيرة بمحبة، بعقل، بنُضج.

يمكن تكون المرة دي هي اللي كانت ناقصة من البداية.

 ودمتم بخير---