في وقت بنجهز فيه قائمة المعازيم وقاعة الفرح وفستان البنت، لازم نسأل نفسنا: "هو العريس اللي جاي يطلب بنتنا، مناسب؟"
سؤال بيتهيأ للبعض إنه بسيط، لكن الحقيقة إنه من أعقد الأسئلة اللي ممكن تواجه أي أب وأم في حياتهم.
لأن ببساطة، إحنا مش بنختار ضيف للعشاء، ولا شريك في مشروع تجاري... إحنا بنختار راجل هيعيش مع بنتنا كل تفاصيل عمرها.
الموضوع مش بس شهاداته إيه، أو شغله فين، أو حتى بيكسب كام.
الموضوع أكبر بكتير: هل فيه توافق؟ هل فيه احترام؟ هل فيه استعداد لتحمل المسئولية؟
في مجتمعنا، للأسف، لسه في ناس بتقيس العريس بماركة عربيته، أو عدد القراريط اللي في حتة الأرض اللي بيملكها.
لكن اللي بيفهموا بجد، واللي شايفين الصورة كاملة، عارفين إن اللي بيصنع البيت مش الذهب ولا الشقة...
اللي بيصنعه هو "الأمان".
أمان البنت وهي بتعيط من غير ما تتحاسب، أمانها لما تبقى تعبانة ويتقالها "إنتي أهم من أي حاجة"،
أمانها لما تغلط ويتقالها "كلنا بنغلط، يلا نصلح سوا".
الراجل اللي لازم ييجي ياخد بنتنا مش بس راجل محترم من برّه، لكن لازم نعرفه من جوه.
اسألوه عن علاقته بأمه، بصاحبه، بطريقة كلامه عن الستات، عن نظرته للزواج، عن مفهومه للتربية.
افتحوا معاه حوارات حقيقية، مش مقابلات تمثيلية.
خلي البنت تشاركه كلام حقيقي، مش تسأله: "بتحب السفر؟" وتسكت... لأ، اسأليه:
"لو اختلفنا، هتتعامل إزاي؟"،
"لو حصلك ظرف مادي، هتفضل محتفظ باحترامك لمراتك؟"
ومتنسوش تسألوا نفسكم سؤال أخير بعد ما يمشي:
"لو بنتي مرت بمحنة، الراجل ده هيبقى سند؟ ولا عبء جديد؟"
لأننا نقدر نختار فستان غلط، ونغيّر الكوافير، ونبدّل الكوشة،
لكن لو اخترنا العريس غلط... صعب جدًا نرجّع الوقت.
عايزة اقولكم ..اختاروا لبناتكم رجالة تبني معاهم بيت، مش بس تحط صورهم على الحيطة.
رجالة تقول لهم "أنا جنبك" وتصدق الكلمة... مش بس تنطقها.
دمتم بخير---
2
-2
