في رثاء شهدائنا علي الحدود المصرية الفلسطينيه المحتله

علي حدود الوطن قالوا لي خدمتك
وحضرة الظابط قالي وريني همتك
فتَّح عنيك علي أرضك واشوف فتوتك
وشيخ القريه قالي مبروك عليك فرحتك
مهو أصلك متعرفش الحراسه في سبيل الله
دي جنة الخلد تتزين وتتهيأ لحارس بلاد الله
وقفت في الخدمه وأنا فرحان ... وأنا سهران
ولما طلع النهار لقيت نجمه طاله مكان الشمس
يا واد يا حسين صحصح وقوم قولي دي تطلع ايه
ولا حسين عارف وانا عمري ولا اتعلمت
ولا السؤال باين ... يا ريتني ما اتكلمت
وسألت أستاذ صابر ابن الحج علوان
مهو أصل انا من جيل معرفش له عنوان
وأستاذ صابر ده راجل يفهم حتي في الالوان
قال لي ده علم صهيوني ملعون وجبان
والحرب بينا وبينهم من زمن الفراعنه كمان
وقفت قدامه ولا فاهم منه أي كلام
بقي الشيخ في جامع القريه يقولي كلام
وحضرة الظابط في الوحده يقولي كلام
وأشوف الريس علي الشاشه كان يقولي كلام
مره كان بيقول أرض العرب خط أحمر... وبنحذر
هو التحذير من القواد يبقي اسمه تحذير..؟!!
يبقي اسمه تخدير ... يبقي اسمه تزوير
و شوفت صوره علي الجبهه ولا الاحلام
شفت الخسيس مع عصابه علي الجبهه .. ليه ؟!!
وكان معاهم معاون بيسلم سلام ألأَحِبَّهْ .. ليه ؟!!
متفهمونا يا ناس احنا بنحرس مين
متفهمومنا مين مع مين ومين علي مين
مش بردو الأمه واحده .. والا الحقيقه اتنين ؟!!
أمة الرؤسا مع الساسه والكل يشجب ويدين
وأمة شعوب سكرانه زعمائها خاينين
ودمي سال علي الرمله ولا باين حتي السبب مين
وحتى خطبة جهاد شيوخنا عنها صايمين
واخويا ومراته وعياله بين حفرتين ضايعين
والأمه بقت اتنين ... والشعب بقي شعبين
شمالي وجنوبي ... ! والشرق بقي شرقين
حتي اللي كان الطيابه بيقولوا عليه من الفرسان
بقي نص شعبه مهلوس ونصه التاني جرذان
ولجل الريس ما يعيش زعيم طول الزمان
خلي الكل حواليه عايشين كما الخصيان
زعماء دول بشناب و الأصل نسوان
علي الشعوب رجاله وعلي العدا خرفان
والمجلس علي الشعب سايق العوجان
مهو أصل اللي اتقتل إنسان بلا عنوان
وأخويا لو خد طاري يقولوا عدوان
وعلي جدار الزمن بكتب بدمي هوان
ويبقي اللي اتقتل مش عارف اتقتل ليه
ولا اللي واقف وشايفه قادر يقول طب ليه
ودمنا بينزف علي أرض طاهره من ايه
مهو احنا نتفرق وهو يلم حبايبه حواليه
والزعما قعدوا واتباحثوا وقالوا دي القاعده
متفهمونا يا ناس أنا مين .. ومين دي القاعده
لوفي كلام علي الارض ... !! ده كلنا قاعده
دي أرضي وعرضي ورواها جدودي بدماهم
مين فينا يبقي عدو .. ومين هيحمي حماهم
مهو الجواب مش باين حتي اسألوا الفاهمين
يا داسس السم في شراب الروح متفوق
ده اللعب علي المكشوف اطلع شويه لفوق
بيقولوا كام كيلو يأمنوا حدودهم
وبكره كام كيلو مهي أرض أجدادهم
وبعده يخدوها أصل احنا أعداهم
ونرجع ونتفاوض مهو احنا ولاد عمامهم
عشان أزمة سكن عندهم وكلاب بتتكلم
بيقولوا أزمة سكن والأرض عندي براح ... متتعلم !!
وسألت أستاذ صابر يعني إيه تصعيد .. يعني ايه تهديد
مهو أصل انا من جيل ملوش في السياسه والتعقيد
وعلي رأي قولة جدي الدم يمحيه دم
والأرض لاصحابها مهما نشيل الهم
يا أرض الرجال ثوري واتمردي مره
خلينا نتكلم جد في العمر لو مره
حتي الكلام بقي ماسخ والعيشه كمان مُرَّه
هو السلام بالعافيه .. ؟!! بكفايه مط وعود
لو كان ناقصكم جرئه انا قلبي موجود
ده حتي زي الصخره في قلعة أسود مولود
يا رملة الصحرا .. متجاوبي علي سؤالي
مش بردو دول رجاله ودمهم غالي ...!!
يا حارس القاتل وحابس المقتول
يا حاجز الْعِلَّهْ عن المَعْلُوُلْ
ولا هقبل اعتذار ولا حتي لحس نعول
هو اعتذار هيرجع كرامة المقتول
والا هيبقي الوطن للاعتذار علي طول
مش بردو دول أعدائنا والا نظام وفلول

محمود صبري