الدنيا دي دقة زار محتار
بين عقل وروح إنسان
تضرب ع الدف بمهل وعقل
وتقلب في آخرها جنان

الدنيا دي دقة زار محتار أصلا للعفاريت
ينزلو ترزيع في بني الإنسان
وكمان خبط وتهديد

ملهاش شاكم ملهاش حاكم
ماشية على كيفها وبس
ونفسنا يوم ترحم قلبنا
وتخلي عندها ذوق
وتخلي عندها حس

من غير إحساس
تعبنا خلاص
وجبنا آخرنا خلاص
ولا فيه إحساس ولافيه إخلاص
في وشوش وقلوب الناس

رايحين على فين
يا بني آدمين
غير تربة متر في متر
ماتعيشوا كده في سلام وأمان
وضحك وبطلوا فقر
واللي يعكر صفو الأيام
الهي يلهفو ميت قطر

متفاتة يا خلق
اعقلوا كلمة مش رقص همج وهزار
لو فقتوا صحيح وعرفتوها
حنسكت دق الزار وتبقى قلوبنا جميلة
وتبقى بيوتنا عمار

رانيا ثروت