الشرنقة بتفضل محوطة على الفراشة ومحوطاها لحد ما نموها يكتمل وتكون جاهزة تخرج، قادرة على للطيران، يعني لحد تمام النضج، ولو حد مزق الشرنقة من على الفراشة قبل الأوان المسكينة هترفرف بجناحتها، هتحاول تطير، وممكن فعلا تطير شويا مش كتير وبعدين تموت!

اللي عايزة أقوله ببساطة، إننا احيانا بيصعب علينا اولادنا يمروا بتجربة قاسية تألم ارواحهم، توجعهم، فبنفضل حوالهم نحاول نمزق شرنقة الألم ونخرجهم من تجربة وهم لسه ماستوعبوش الحكمة منها، مازعلوش كفاية، مافهموش، أو على أقل تقدير ماخدوش حقهم من التجربة، بنحاول لأن قلوبنا رافضة لهم الوجع, وفي الحقيقة احنا كمان لازم تستوعب إن من حقهم يتوجعوا، يزعلوا، ينعزلوا شويا لحد ما يبقوا قادرين على المواجهة، مواجهة نفسهم وتجاربهم وده طريقهم الحقيقي للقبول ثم التعافي...

مش بقول نسيبهم تماما ولا نتفرج عليهم متألمين لكن تبقى قريبين، نفهم، نطبطب، نساند، ونراقب الموقف من بعيد بس بشوية مسايسة وكتير من الصبر ..