عروسة لعبة

عروسة حلوة ليها العجب

عروسة حلوة من خشب

شافها الولد 

قام راح أوام ليها انجذب

قال انتي أحلي عروسة شفتك

ولا قبلك يوم جبت اللعب

عايش حياتي حبة جد

وحبة كان فيهم شغب

تعالي واملي دنيتي

ده أنا كل حيلتي وحدتي

وحبة كتب

هتكوني فيها أغلى حد

من غير شراء وسعر اتحسب

عروستنا طارت م الفرح

قالت نصيبي وانكتب..

أكون معاه برة الرفوف..

نفرح سوا وانسى التعب

هيكونلي فرح غرقت فيه

وأكونله م الأحزان هرب

نسيت فلحظة إن الخشب

عمره مايبقي فيوم دهب

وتهى مهما حبته

هو شايفها لعبته

ومسيره يوم يلعب بغيرها

وهي ترجع في العلب

حتي لو كانت جميلة

لو حتي كان ليها العجب