كباية شاي

كباية من الشاي الدافي

وكام ورقة من النعناع طافي

دوامة قصادي وانا بقلب

واللون متعكر مش صافي

لون حزني مخليه متعكر

ماسخ مهما يزيد السكر

بارد لو حالا متحضر

وكأن لهيبه دة مش كافي

باردة ببرودة أيامي

مُرة بمرارة أحلامي 

قدام الكل مزاج عالي

جواها الذكرى دي سيافي

بالضحكة الغايبة تفكرني

ع اللمة الفايتة تحسرني

من غير ما اشربها تسهرني

وبترمي الهم على كتافي

كنتي ما بينا مشاعر مش كيف

وبخارك راسم حلم لطيف

فنجان في البعد بيبقى سخيف

وفي قُربه مزاجي وإنصافي

ياريتِك كنتي تهديني

والذكرى القاسية تنسيني

مش كل ماتيجي قصاد عيني

افتكره وهو بعيد غافي