فنون البعاد

بدل ماتتعب حضرتك 

وتدرس أوي فنون البعاد

انت اعتبرني ميتة 

واعملي في خيالك حداد.. 

عايزة جنازة كويسة 

ومدفن كمان قد المقام 

اردم تراب على حبنا 

واقرا يس قبل الختام..

وإن صدفة مرة قابلتني 

ابقي ارسم الوش الحزين

وقول حبيبتي تشبهك 

يخلق من الشبه أربعين ..

انسى وفارق لو قدرت 

وارمي وراك كل اللي فات

وإن قالوا ليك إزاي صبرت

قول حي، وابقى من اللي مات..

وأنا بردو هدفن حبي ليك

وانسى انه كان لي طوق نجاة

الذكرى حتى كتير عليك

هكتب لها شهادة وفاة ..