بنتفارق

وكان الخلاف قطرة

فبحر العند جوانا

ونتسابق

فمين هيطول الفترة

ونتعزز على هوانا

حمينا الحب فبيوت قش

بعصفة ربح تروح طايرة

بأول خبطة نلقاه هش 

ويتدارى ف قلوب حايرة

ونتمسك بوجع القلب

و أيامنا بتسرقنا

وننسى بالكرامة الحب

لحد ما تصحى أشواقنا

فنغرق جوة بحر دموع

نقول لو بس فيها رجوع

بنظرة وبسمة نتعاتب

ثواني ويخلص الموضوع

وبعد القسوة ما تفارق

ويفضل قلبنا العاشق

نقول كان ليه من الأول

فلحظة عِند نتفارق