نشرة اخبار الكواكب:20 ابريل:طاقة تقيلة واستدعاء للذكريات القديمة

من وقت #اكتمال_القمر والطاقة تقيلة .. #القمر يوم يقف في وش زحل وتاني يوم يتخانق مع المريخ ودول من اتقل الطاقات اللي بتاثر ع مزاجنا وحيويتنا وافكارنا ومعلش نكمل شوية ونستحمل 4 ايام كمان لان #عطارد هو كمان قرر يتخانق مع #زحل..طيب ده بياثر علينا ازاي؟

#عطارد الكوكب المسؤول عن التفكير والتواصل والمواصلات من النهاردة ومدة 4 ايام هنلاحظ عندنا قلة تركيز واضحة..نسيان وتشتت..افكار سوادوية حبتين هنبص لنص الكوباية الفاضي في كل حاجة وده هتحسوه وتلاحظوه ع مواقع #التواصل_الاجتماعي ..كل حادثة تافهة او كبيرة الناس هتقلبها ملطمة 

ممكن كمان يحصل تأخير شوية  في رحلات القطورات والطيران والاتوبيسات في اماكن متفرق من العالم 

بيزيد حدوث اعطال العربيات ووسايل الموصلات ومشاكل #النت

الذكريات القديمة اللي بتحاولوا تنسوها هتلاقوها طالعة تنط في وشكم فجاة من غير مناسبة وتحديدا ذكريات الطفولة ومشاكلكم مع اهلكم..هتتفاجؤوا انكم بتستدعوا ذكريات من سنين طويلة اوي  ومع كده تنسوا انتوا اكلتوا ايه امبارح

مع كمان وجود زاوية نحيسة بين #الزهرة و #القمر ده مش وقت مناسب تبعتوا رسايل لحد تصالحوه او تبدأوا علاقات عاطفية جديدة ..الكلام هيخونكم ومش هتعرفوا تعبروا صح

وارد جدا اغلب المشاكل تكون بسبب التعبير الغلط فخلوا بالكم جدا من رسايلكم وايميلاتكم وراجعوا شغلكم اكتر من مرة ..غلطات الكتابة وقلة التركيز والحسابات هتبقي واضحة الكام يوم دول

#الشمس دخلت بحمد الله #برج_الثور لمدة شهر وبيبدا كده موسم التيران وعلشان تعرف تاثير ده الشخصي عليكي لازم تكون عارف مكان برج الثور في خريطتك الفلكية..لكن عموما لمدة شهر ده تاثير عام علينا ان اهتمامنا هيركز علي وضعنا المادي..بناخد خطواتنا بهدوء واضح اكتر من الشهر اللي فات ..اللي كان في نوع من التهور نسبيا في تصرفاتنا ..اهتمام بالاكل ونوعه كتير بيفكروا يبداوا #دايت او نظام اكل صحي مش عايزة اقولكم انه هببقي مجرد تفكير بس لان #الزهرة حاكم #الثور في #الحوت وهتقترن بالمشتري يعني رغبة اكبر في الاكل والحلويات فنستعيذ بالله من وساوس الشيطان وافكار الدايت الشرير

هتميلوا في اوقات كتير  للاسراف و تحديدا شرا اللبس ومستحضرات التجميل وحاجات كتير ملهاش لازمة وبعدين هتقعدوا تعيطوا كتيير لما تراجعوا مصاريفكم

الشهر ده هيكون حلو لبداية اي علاقات عاطفية عطارد والشمس في الثور يعني الي حد كبير هنفكر بعقلنا وقلبنا مع بعض وعادة العلاقات اللي بتبدأ في موسم الثور بتكون طويلة الامد

الاخبار الاقتصادية ومشاكل الغذاء هتبقي محور الاهتمام في الاخبار لحد نص #مايو وممكن نشوف اكتشافات بترولية في اكتر من مكان في العالم وشركات هتطلع وشركات هتخرج من السوق وربما ازمات غذاء في اماكن

 

فترة وجود #الشمس في #الثور فترة كويسة جدا لانك تبتدي اي مشروع تجاري جديد وهيكون مستقر ان شاء الله تحديدا مشروعات المطاعم او اي حاجة لها علاقة بالموضة والتجميل قبل طاقة الكسوف اللي هتكون يوم 30 ابريل 

خلي بالكم من ادوار البرد علشان هتنشط شوية الكام يوم دول 

 

وزي كل نشرة  يمين عظيم تلاتة دي طاقة عامة ملهاش علاقة ببرج سيادتك 

#نشرة_اخبار_الكواكب