قبل كل نشرة دي طاقة عامة بتأثر ع الجميع بشكل متفاوت حسب خريطتكم الفلكية

#القمر النهاردة ولمدة يومين ونص في #العقرب وقلنا ان ده بيت مش لطيف بالنسباله لانه المشاعر فيه بتكون متطرفة شوية يعني نحب اوي او نكره اوي مفيش وسط وعلشان كده يومين قمر العقرب كل شهر بيكونوا تقال نفسيا وعاطفيا وخاصة مع اقتراب اكتمال القمر الطاقة هتكون ضاغطة نفسيا 

طبيعي جدا الاحلام تكون ملخبطة واغلبها مش لطيفة واغلبكم هتصحوا ناسيينها 

حساسية زايدة وافكار غريبة وميل لتضخيم الامور لاننا بنكون حساسيين بزيادة ونوع من التهور في التعبير عن المشاعر فده ممكن يلبسكم في حيط فاستهدوا بالله واركزوا

الحدس والتخاطر قوي جدا فطبيعي تصحوا ع بالكم حد او تكلموا حد يقولكم انا كنت لسه هكلمكم بس برضه ذكريات الماضي العاطفية هتبقي هي المسيطرة عليكم فهنشوف بوستات نكد زي الفل

المشاعر متطرفة زي ماقولنا يعني مشاكل بسبب الغيرة واردة جدا ميل لتضخيم الامور بشكل درامي وده ممكن يبسبب انفصالات عاطفية كتير مفاجئة خاصة ان #القمر في معارضة #الزهرة واورانوس 

الزهرة واورانوس النهاردة في اقتران تام ربما يحصل زيادة او هبوط مفاجئ في سعر #الدهب او النفط او بعض الاسهم وربما خساير مالية للبعض فحاولوا تنتبهوا ع فلوسكم النهاردة وبكرة جدا خاصة في التحويلات الالكترونية وتجنبوا الشرا الاون لاين 

وارد للبعض ان يجيلهم اعتراف عاطفي من شخص غير متوقع وتحديدا من خلال مواقع التواصل الاجتماعي ..او تتعرفوا ع شخص جديد بس نصيحة برضه مع الزوايا دي مش لازم تثقوا فيهم اوي 

قمر العقرب مرتبط بالرغبة الجنسية فربما تزيد حوادث التحرش او العنف الجنسي بس بما انهم في معارضة اورانوس غالبا النتيجة هتبقي فضيحة"الكترونية" كبيرة فعلي السادة المتحرشين انهم يلموا نفسهم

احتمالية تعرضكم للنصب والخداع او الابتزاز العاطفي واردة اليومين دول فخليكم صاحيين وفايقيين

 #طاقة رجوع قوية للغائبين والمتباعدين تحت تاثير قمر العقرب و تراجع #بلوتو وزحل ...فقوليله شكرا روح لامك لانه في الغالب هيختفي زي مارجع 

يوم مش مناسب لاي اجراء تجميلي ولا لقص الشعر ولا للعمليات الجراحية ولا لشرا الدهب او العقارات او اي حاجة غالية 

#نشرة_اخبار_الكواكب